Astanada áıel kópirden sekirmek boldy

ASTANA. QazAqparat – Astanada Mınıstrlikter úıi mańyndaǵy kópirden sekirmek bolǵan áıelge qatysty mán-jaıdy anyqtaý jumystary júrip jatyr, dep habarlaıdy QazAqparat tilshisi.

«Ázirge tolyq mán-jaılar anyqtalyp jatyr. Qazirgi ýaqytta azamatsha Esil aýdandyq polıtsııa basqarmasyna jetkizildi. Mundaı qadamǵa nelikten barǵanyn anyqtaý maqsatynda odan suraq-jaýap alynyp jatyr», - dep málim etti Astana qalalyq Polıtsııa departamentiniń baspasóz qyzmetinen.

Birneshe mınýt buryn atalǵan oqıǵaǵa kýá bolǵan qala turǵyndary qutqarýshylardyń áıeldi kópirden aman-esen túsirip alǵanyn aıtyp, vıdeolar jarııalady.

Belgili bolǵandaı, áıeldi elordalyq 6 qutqarýshy satysy bar arnaıy tehnıkanyń kómegimen túsirip alǵan.

«Saǵat 12:24-te Astana qalasy TJD bólimsheleri kezekti kelip túsken shaqyrtýǵa shyqty. 8 mınýttan keıin qutqarýshylar áıeldi túsirý boıynsha qutqarý operatsııasyn júrgizýge kiristi. TJD mamandarynyń jedel áreketterimen saǵat 12:37-de áıel avtokólik satysynyń kómegimen qutqarylyp, polıtsııa qyzmetkerlerine tapsyryldy. Qutqarý operatsııasyna Astana qalasy TJD jeke quramynyń 6 adamy jáne 2 tehnıkasy jumyldyryldy», - dep habarlady qalalyq tótenshe jaǵdaılar departamentinen.

Áleýmettik jelilerde kópirge shyǵyp alǵan áıel 7 jylǵa bas bostandyǵynan aıyrylǵan balasyn bosatý talabyn qoıǵany aıtylyp jatyr.