Astanada qorshaǵan ortaǵa zııan keltirmeı kólik jýýǵa múmkindik beretin qanatqaqty joba iske qosylady
Astana qalasynyń Tsıfrlandyrý jáne memlekettik qyzmetter basqarmasy Astana Hub jáne Astana Innovations-pen birlesip Astana Smart City akseleratsııalyq baǵdarlamasynyń alǵashqy kezeńin qorytyndylady. Nátıjesinde turǵyndardyń ómir súrý sapasyn arttyrýǵa baǵyttalǵan ınnovatsııalyq tyń jobalar tańdaldy.
5 mıllıon teńgege deıingi bastapqy qarjylandyrý alatyn 10 startap bolashaqta tutynýshylarǵa óz qyzmetin usynatyn bolady.
«Baǵdarlamanyń aralyq is-sharasy (pre-demo) mańyzdy alańǵa aınalyp, munda 20 qatysýshy qalalyq ortany jaqsartýǵa jáne turǵyndardyń ómir súrý sapasyn arttyrýǵa baǵyttalǵan ınnovatsııalyq sheshimderin usyndy. Jobaǵa barlyǵy 128 ótinim tústi, al olardyń 107-si alǵashqy irikteýden ótti», - delingen habarlamada.
Birinshi kezeńde qatysýshylar salalyq sarapshylarmen tikeleı pikir almasyp, toptyq vorkshoptar men jeke konsýltatsııalarǵa qatysty. Bul olardyń sheshimderin qalanyń naqty qajettilikterine beıimdep, tıisti jetildirýlerdi engizýge múmkindik berdi.
«Seed Money baǵdarlamasy aıasynda usynylatyn qarjylandyrý startaptarǵa óz sheshimderin naqty jaǵdaıda synaqtan ótkizýge múmkindik berip, jobalaryn ári qaraı damytyp, syrtqy naryqqa shyǵarýǵa serpin beredi. Sonymen qatar aımaqtaǵy startaptarǵa Astana Hub ınfraqurylymy, sarapshylardyń keńesteri men keri baılanys, B2G-kezdesýlerge yqpal etý usynylady», - dedi Tanat Óskembaev, Astana Hub basqarýshy dırektory.
Saralanǵan irikteý nátıjesinde bolashaǵy zor 10 startap tańdaldy:
- Protector AI — beınejazbalardy taldaýǵa arnalǵan jasandy ıntellekt múmkindigi bar júıe. Ol soqqy, qulaý jáne ıterý sııaqty zorlyq-zombylyq sıpattaryn anyqtaı alady.
- AdsIQ — qoǵamdyq kóliktegi monıtorlarda kontent pen jarnamany basqarýǵa arnalǵan jasandy ıntellekt negizindegi júıe.
- SPLESh — ekologııalyq taza mobıldi kólik jýý qyzmetin usynady, ol qala ishinde qorshaǵan ortaǵa zııan keltirmeı avtokólikterdi jýýǵa múmkindik beredi.
- HOOOD — tsıfrlyq syrtqy jarnamany (DOOH) basqarýǵa arnalǵan platforma, ol jarnama berýshilerge, ásirese, shaǵyn jáne orta bızneske, jarnamalyq naýqandardy naqty ýaqyt rejıminde iske qosyp, beıimdeýge qolaıly qural usynady.
- Autism spectrum — aýtızmi bar balalar men olardyń ata-analaryna baǵyttalǵan Qazaqstan aýdıtorııasyna arnalǵan qosymsha.
- Rationeel — bultty sheshim men mobıldi qosymshany biriktiretin gıbrıdti júıe. Ol bıznes-protsesterdi tsıfrlandyrý jáne derekterdi jınaýdy ońtaılandyrýǵa beıimdelgen.
- i-ConS — qurylys pen jóndeý jumystaryn basqarýdy, jobalardyń bıýdjetin baqylaýdy jáne materıaldardy qadaǵalaýdy jeńildetetin mobıldi qosymsha ári veb-ınterfeıs.
- Green Cars — Qazaqstanda elektromobılder ınfraqurylymyn damytýmen aınalysyp, IT-platforma men zarıadtaý stantsııalary jelisin usynady.
- Hi Doctor — dárigerdiń klınıkalyq kómekshisi rólin atqaratyn klınıkalyq sheshimderdi qoldaý júıesi.
- qMed — qant dıabeti, arterııalyq gıpertenzııa men sozylmaly júrek jetkiliksizdigi sııaqty sozylmaly juqpaly emes aýrýlardy basqarýǵa arnalǵan platforma.
Baǵdarlamanyń sońǵy kezeńi — Demo Day is-sharasy, munda qatysýshylar ózderiniń pılottyq jobalarynyń nátıjelerin ákimdik ókilderi men salalyq sarapshylarǵa usynady. Eń úzdik IT-sheshimder qalalyq ınfraqurylymda ári qaraı engizý múmkindigine ıe bolady. Osylaısha, qala turǵyndarynyń ómirin jaqsartýǵa ozyq tehnologııalardy kiriktirýge múmkindik beredi.