Astanada aýtızm ortalyǵy ashyldy

ASTANA. QazAqparat – Astanada jylyna 900 balany qamtıtyn aýtızm ortalyǵy ashyldy, dep habarlaıdy QazAqparat.

Juma kúni Astana qalasynyń ákimi Jeńis Qasymbek «Asyl Mıras» aýtızm spektri buzylǵan balalarǵa arnalǵan ortalyqqa bardy.

Shahar basshysy Instagram-paraqshasynda jazǵandaı, ortalyq Bolat Ótemuratov qory ákimdiktiń qoldaýymen júzege asyrǵan Astanadaǵy ekinshi mekeme. Qazir muǵalimderdi qabyldaý jumysy júrip jatyr, kóp uzamaı balalar osy ortalyqqa baratyn bolady. Jańa ortalyq jylyna 900-ge jýyq balany qamtı alady.

Sondaı-aq J.Qasymbektiń aıtýynsha, bıyl birqatar mektep pen balabaqshada ınklıýzııany qoldaý kabınetin ashý josparlanyp otyr. Sol sııaqty jańa turǵyn úı keshenderiniń birinshi qabatynda áleýmettik nysandardy, onyń ishinde ońaltý ortalyqtaryn ashý qarastyrylatyn bolady.

«Mundaı ortalyqtardyń ashylýyn ata-analar taǵatsyzdana kútetinin bilemin», - deıdi elorda ákimi.

Budan bólek, Jeńis Qasymbek erekshe qajettilikteri bar balalar qatynaıtyn №89 balabaqshaǵa at basyn burdy. Munda «Bolashaq» korporatıvtik qorymen birlesip ınklıýzııany qoldaý kabınetteri ashylǵan.

«Kezdesýde ata-analar tıýtorlardy daıyndaý máselesin kóterdi. Biz osy baǵytta jumys isteıtin bolamyz. Ońaltý ortalyqtary balalardyń densaýlyǵyn saqtaýǵa, oń nátıjeler kórýge ári olardy áleýmettendirýge múmkindik beredi», - dep jazdy astana basshysy.