Astanada aty ańyzǵa aınalǵan ǵaryshker Toqtar Áýbákirovti 70 jyldyǵymen quttyqtady (FOTO)

ASTANA. QazAqparat - 70 jyldyq mereıtoıy kúninde Otandyq avıatsııanyń ańyzǵa aınalǵan sheberi, Halyq qaharmany, Keńes Odaǵynyń batyry, avıatsııa general-maıory, ǵaryshker Toqtar Áýbákirov QR Qarýly Kúshteri Ulttyq áskerı-patrıottyq ortalyǵynda quttyqtaýlardy qabyldady.

Mereıtoı ıesin quttyqtaýǵa Aqmola óńirlik garnızonynyń áskerı qyzmetshileri keldi, olardyń ishinde Qazaqstannyń Áskerı-áýe kúshteriniń ushqyshtary da bar. Sharaǵa   áskerı ushqysh, áskerı ushaqtardy synaqtan ótkizýshi - qazaqstandyq Toqtar Áýbákirovtyń qalyptasý jolyn baqylaǵan KSRO áskerı avatsııa ardagerleri, Keńes Odaǵynyń, Reseı Federatsııasy men Eýroodaq elderiniń  ushqysh-ǵaryshkerleri keldi, dep habarlady QR Qorǵanys mınıstrligi baspasóz qyzmetinen.

Mereıtoı ıesiniń qurmetine Ulttyq áskerı-patrıottyq ortalyqta Qazaqstan estrada juldyzdarynyń qatysýymen kontsert ótti. Áskerı ushqysh, ǵaryshker, Qazaqstannyń halyq batyry jolynyń qalaı bastalǵanyn qonaqtar Qarýly kúshter murajaıynyń zaldarynyń birinde uıymdastyrylǵan fotokórme arqasynda eske túsirip, muqııat tanysty.

Toqtar Áýbákirov - áskerı ushqysh qana emes, ol tuńǵysh qazaq ǵaryshkeri. 1991 jyly  2 qazanda ekıpaj quramynda «Soıýz TM-13» kemesinde ǵaryshker zertteýshi retinde ol ǵaryshqa attandy. Onda 7 kún 22 saǵat, 13 mınýt boldy. Keıinnen Áýbákirov memlekettik qyzmette jumys atqardy, ár jyldary QR Memlekettik qorǵanys komıteti tóraǵasynyń birinshi orynbasary, QR Prezıdentiniń ǵaryshty ıgerý jónindegi kómekshisi bolǵan.

Ǵaryshker jas ushqyshtarmen tájirıbesimen bólisip keledi. Qazaqstan ÁÁK ofıtserleri úshin ǵaryshker, eńbek sińirgen synaqshy-ushqysh Toqtar Áýbákirov -   úlgi tutar azamat.