Astanada ashylatyn jańa temirjol vokzaly táýligine 35 myń jolaýshy qabyldaıdy
Zamanaýı keshenniń syıymdylyǵy eski vokzalmen salystyrǵanda 3 ese artyq. Zamanaýı ǵımarattyń aýmaǵy 27 myń sharshy metr. Mundaı keshen elimizde buryn-sońdy bolǵan emes. Ádettegideı poıyzdar vokzaldyń syrtyna emes, ishine toqtaıdy. Ol úshin 3 qabatty úıdiń bıiktigi shamasynda arnaıy konkorstar salynyp jatyr. Oǵan baspaldaq nemese jedelsaty arqyly kóterilýge bolady. Myńjyldyqtar alleıasynyń janynan salynyp jatqan ǵımarattyń jobasy jaqynda ǵana Frantsııa elinde ótken bedeldi baıqaýdyń jeńimpazy atandy.
«Bul qurylystyń eskızdik jobasy qalalyq keńeste sheshilgen. «QTJ» Astana arhıtektýrasy jáne qala ákimdigimen kelisilgen. Qazirgi kezde tóbesin jabý jumystary júrip jatyr. Sondaı-aq syrty qaptalyp jatyr. Keshenge qatynaıtyn birneshe estakadalar qurylysy júrip jatyr. Jolaýshylar úshin de vokzalǵa jetýdiń qolaıly joldary qarastyrylǵan. Munda jeke jáne qoǵamdyq kólikpen ońaı kelýge bolady. Temir tulparlar úshin 1181 oryn bar. Olardyń 740-y ǵımarattyń ishinde, qalǵany syrtynda», - deıdi «QTJ» UK» AQ kúrdeli jobalardy júzege asyrý bóliminiń basshysy Baǵzat Rahymjanov.
«Platformalar men estakadalardyń uzyndyǵy 600 metrdi quraıdy. Poıyzdar júretin aýmaqtyń astyndaǵy 2 qabatta kólik qoıatyn oryndar ornalasady. Poıyzdar qatynaıtyn platformalardyń aýmaǵy 59 sharshy metr. Al jabyq oryndardyń aýmaǵy 130 myń sharshy metr. Bılet kassalary birinshi jáne tórtinshi qabattarda ornalasady. Jolaýshylarǵa yńǵaıly bolý úshin vokzaldyń ishinde meıramhanalar, qonaqúıler, ana men bala bólmesi, medıtsınalyq beket bolady», - deıdi Sembol» AQ dırektorynyń kúrdeli qurylys jónindegi orynbasary Súleıman Iylmaz.
Búgingi tańda qoldanystaǵy vokzal jylyna 4 jarym mıllıon jolaýshyǵa laıyqtalǵan, dep jazdy 24.kz. Al jańa keshen 12 mıllıon adam qabyldaı alady. Ol ashylǵannan keıin munda 1 myńnan astam adam jumyspen qamtylady. Mamandardyń aıtýynsha, qazir qurylys josparǵa saı júrip jatyr. Keshen qoldanysqa 2017 jyldyń kókteminde berilýi tıis.