Astanada «Ashyq derekter» portalynyń» jobasy kópshilikke usynyldy
QR KKM baspasóz qyzmetiniń málimetinshe, Qazaqstan Ortalyq Azııa aımaǵy óńirinde «Ashyq úkimet» bastamasyn birinshi bolyp usyndy. Bul joba «Aqparattyq Qazaqstan - 2020» memlekettik baǵdarlamasy aıasynda iske asyrylatyn bolady.
Ashyq aqparat portalynda barlyq memlekettik organdardyń málimetteri- statıstıkalyq derekter, mekemelerdiń ornalasýy, mekenjaı týraly aqparattar, baılanys telefondary, jaýapty qyzmetkerler týraly aqparat, salyq deklaratsııalary men ártúrli anyqtamalar jınaqtalyp, saqtalady. Bul aqparatty kez-kelgen azamat paıdalana alady.
Ashyq derekterdi óndirip, túrlendire ózgertip, derekter bazasyna qaıtarýǵa nemese basqa málimettermen biriktirip jańa bir aqparat toptamasyn jasaýǵa bolady. Ashyq aqparattar negizinde IT-kompanııalar jurtshylyqqa kúndelikti paıdaný úshin qajetti ártúrli ınteraktıvtik qosymshalar ázirleı alady.
Osyndaı qosymshalardyń biri - «Memlekettik mekemeler navıgatory» qanatqaqty jobasy. «Ulttyq aqparattyq tehnologııalar» AQ Basqarma tóraǵasy Rýslan Eńsebaev: «Azamat ózi turǵan jerdi anyqtap alǵannan keıin, atalýy men mekenjaıyn bile tura, jaqyn jerdegi mekemeni taba alady. Mysaly, notarıýsty nemese, mektep týraly aqparat bile alady» - dep aıtyp ótti jobany tanystyrý barysynda.
Sonymen qatar, qosymshalar arqyly paıdalanýshylar, bılik nazaryna túsetindeı, oı-shuńqyry kóp, isten shyqqan joldardyń, nemese turaqqa jol erejesiniń buzylýymen qoıylǵan kóliktiń fotosyn jibere alady.
Úkimettik derekterdiń ashyq túrde jarııalanýy memleketti basqarý úderisterin ashyq jáne aıqyn túrde ótkizýge múmkindik beredi. Ártúrli derekter men máseleniń sheshilý barysy týraly suraqtarǵa jaýap alý úshin azamatqa memlekettik organdarǵa júginýdiń qajeti bolmaıdy. Barlyq aqparat data.gov.kz portalynda qoljetimdi bolady.