Astanada «ashyq aspan» prıntsıpin saqtaýdy usynamyz - Jeńis Qasymbek

ASTANA. QazAqparat - Sońǵy jeti jyldyń ishinde áýe qatynasymen Qazaqstan arqyly ótetin jolaýshylardyń sany 20 esege ósti. 2010 jyly atalǵan kórsetkish 20 myń bolsa, ótken jyly 478 myń adamǵa jetti, dep xabarlaıdy QazAqparat tilshisi.

QR Investıtsııalar jáne damý mınıstri Jeńis Qasymbektiń aıtýynsha, Qazaqstan arqyly qytaılyqtar Eýropaǵa, Reseı men Túrkııaǵa jıi baryp júredi. Budan bólek, Eýropadan Úndistanǵa, Ýkraınadan Ózbekstanǵa, Qyrǵyzstannan Ońtústik Koreıaǵa baryp júrgenderdiń sany artyp keledi. «Jyldyń aıaǵyna deıin Qazaqstan arqyly ótetin áýe qatynasymen ótetin tranzıttik jolaýshylardyń jalpy sany 600 myńǵa jetedi degen boljam bar. Al 2020 jylǵa deıin 1,6 mln-ǵa jetedi. «Eır Astananyń» málimeti boıynsha bir tranzıttik jolaýshy Qazaqstanda 250 dollardaı qaldyryp ketedi. Onyń ishinde qonaq úı, tamaqtaný jáne taǵy basqa shyǵyndary bar», - dedi Jeńis Qasymbek Úkimettiń búgingi otyrysynda.

Mınıstrdiń sózine qaraǵanda, búginde EKSPO aıasynda Qytaı Halyq Respýblıkasynyń azamattary úshin 72 saǵatqa deıin vızasyz rejım pılottyq joba retinde qolǵa alyndy. Sondaı-aq, kórme kezinde Eýropalyq odaq, Ekonomıkalyq yntymaqtastyq jáne damý uıymy jáne basqa da memleketter úshin engizilgen vızasyz rejımniń arqasynda týrısterdiń sany artyp otyr. «EKSPO aıasynda Astanada ashyq aspan júıesi engizildi. Ol da - pılottyq joba. Sheteldik kompanııalar úshin barlyq shekteýlerdi alyp tastady. Jyl basynan beri Astanadan toǵyz jańa xalyqaralyq reıs ashyldy. Osy oraıda biz qazirgi tájirıbeni jalǵastyryp, kelesi jyly da Astana úshin «ashyq aspan» prıntsıpin saqtaýdy usynamyz», - dep atap kórsetti Jeńis Qasymbek.

Aıta keteıik, otyrys barysynda mınıstr kelesi jyldan bastap azamattyq avıatsııa otandyq kerosınmen tolyǵymen qamtamasyz etiletinin jetkizdi.