Astanada Aryslanbek Aıtqulov álemniń eks 33-raketkasyn utty

ASTANA. QazAqparat - Qazaqstandyq Aryslanbek Aıtqulov Prezıdent kýbogi ATP Challenger Tour týrnıriniń irikteý saıysyn sátti bastady, dep habarlaıdy QazAqparat tilshisi.

Qaraǵandy tennıs mektebiniń 19 jasar túlegi, dúnıejúzilik reıtıngte 1345-orynda turǵan A.Aıtqulov bastapqy kezdesýin álemniń burynǵy 33-inshi, qazirgi 740-raketkasy, ózbekstandyq, ATP 250 jarysynyń eki dúrkin chempıony Denıs Istomınmen ótkizdi.

Qazaqstandyq tennısshi 6:2, 6:4 esebimen jeńiske jetti.

Aryslanbek erteń irikteý saıystarynyń fınalynda negizgi dodaǵa ótý úshin álemniń 665-raketkasy, úndistandyq Kalıand Pýnachpen talasady.

Basqa qazaqstandyq Vıtalıı Zatsepın men Grıgorıı Lomakın qarsylastaryna jol berdi. 17 jasar Zatsepın belorýssııalyq Egor Gerasımovtan 3:6, 2:6 esebimen utylsa, Lomakın reseılik Evgenıı Fılıppovtan óte almady - 1:6, 2:6.

Eske sala keteıik, budan buryn Astanada Prezıdent kýbogi úshin tennısten halyqaralyq týrnır bastalǵanyn jazǵan bolatynbyz.