Astanada arnaıy qymyz kórmesi ótedi

ASTANA. QazAqparat - 1 naýryz - Alǵys aıtý kúninde Astanada Qazaqstan halqy Assambleıasynyń «Qazaq halqyna myń alǵys» respýblıkalyq forýmy ótedi. Shara barysynda alǵash ret emdik qasıeti bar sýsyn - qymyzǵa arnalǵan kórme qoıylady, dep habarlaıdy QazAqparat QHA saıtyna silteme jasap.

Barlyq nıet bildirýshiler Ulttyq murajaıdyń taqyryptyq eksponattaryn, emdik sýsyn daıyndaýǵa arnalǵan quraldardy tamashalaı alady, sondaı-aq ejelgi jáne qazirgi zamanǵy tehnologııalar boıynsha daıyndalǵan qymyz men bıe sútiniń dámin tatyp kóre alady.

Kórme qarsańynda Uly dalada qymyzdyń paıda bolý tarıhy, sýsyn daıyndaý tehnologııasy, túrleri tanystyrylyp, onyń emdik qasıetteri týraly aıtylady.

Eske sala ketsek, tórt jyl buryn Qazaqstan halqy Assambleıasynyń 2015 jyldyń sáýirindegi 22-shi sessııasynda sóılegen sózinde Memleket basshysy Nursultan Nazarbaev Qazaqstanda Alǵys aıtý kúnin atap ótýdi usyndy. Merekeni bul kúni atap ótýdiń basty sebebi - Qazaqstan halqy Assambleıasynyń qurylǵan kúni. Bul kúni kóptegen etnos ókilderi bir-birine jáne qazaqtarǵa úlken ulttyq kúızelis týdyrǵan zamanda tutas halyqtardyń kúshpen qonys aýdarylyp, stalındik qýǵyn-súrgin jáne etnostardyń Qazaqstan dalasyna jer aýdarylýy kezeńinde tózimdiligi men qonaqjaılylyǵy úshin alǵys bildire alady.

«Merekeniń negizdemeleriniń biri - «Óz tarıhyńdy umytpa jáne ony maqtan et». Osy jyly ol Prezıdenttiń «Uly Dalanyń jeti qyry» maqalasyna úndesip otyrǵanyn atap ótken jón bolar. Osy merekege Astanada Qymyz kórmesi oraılastyrylyp otyr - sebebi qazaqtar ejelgi kezde kıiz úıiniń esigine toqtaǵan jolaýshyǵa eń aldymen qymyz, sodan keıin dám usynǵan», - delingen habarlamada.

Aıta keterligi, qymyzmuryndyq pen bıe baılaý ıÝNESKO mádenı muralarynyń qataryna endi.