Astanada «Armysyń, áz Naýryz!» merekelik sharasy ótedi

ASTANA. QazAqparat - 16 naýryzda elorda turǵyndary men qonaqtary Naýryz meıramyna arnalǵan merekelik is-sharaǵa qatysa alady. Mereke qonaqtaryna ulttyq taǵamdar usynylady, ulttyq sport jarystary, qazaqstandyq estrada juldyzdarynyń qatysýymen kontsert ótkiziledi, dep habarlaıdy elorda ákimdiginiń baspasóz qyzmetinen.

Sharany uıymdastyrýshy - Astana qalasynyń Tilderdi damytý basqarmasy. 2015 jylǵy 16 naýryz kúni saǵat 14.00-de Q. Qýanyshbaev atyndaǵy memlekettik akademııalyq qazaq mýzykalyq drama teatry ǵımaratynyń aldynda «Ulystyń «Armysyń, áz Naýryz!» sharasy ótedi. Kıiz úı, altybaqan qurylyp, mereke qonaqtaryna naýryz kóje, ulttyq taǵamdar usynylady, kópshilikke arnalǵan ulttyq sport túrlerinen saıystar ótkiziledi jáne belgili ánshi Telman Nurtaı, «Dáýir», «Aı-arý» trıolary t.b. ónerpazdar óner kórsetedi. Іs-sharanyń ekinshi bóliminde Q.Qýanyshbaev atyndaǵy qazaq mýzykalyq drama teatrynyń sahnasynda tanymal dástúrli ánshiler jáne estrada juldyzdary Erlan Rysqalı, Dosymjan Tańatarov, Ardaq Balajanova, Qanat-Sveta Aıtbaevtar, Klara Tólenbaeva án shyrqaıdy, «Serper» respýblıkalyq dombyrashylar toby, «Gúlder-aı» bı ansambli óner kórsetedi, belgili aıtys aqyndary Iranǵaıyp Kúzembaev pen Maqsat Aqanov kóktem aıtysyn jáne Q.Qýanyshbaev atyndaǵy teatrdyń ártisteri kórinis usynady. Merekelik dýmanǵa Qazaqstan Respýblıkasy Parlamenti Májilisiniń depýtattary, zııaly qaýym ókilderi, etnomádenı birlestikterdiń, ortalyq jáne jergilikti atqarýshy organdardyń, úkimettik emes uıym jáne jastar qozǵalystarynyń, oqý oryndarynyń ókilderi shaqyryldy.