Astanada árbir tórtinshi qylmystyq is qazaq tilinde qaralady

<p>ASTANA. KAZINFORM &ndash; Elordada qylmystyq isterdi memlekettik tilde júrgizýdiń algorıtmi qalaı jumys isteıdi? Byltyr qansha qylmystyq is qazaq tilinde júrgizildi? Osy jáne ózge de suraqtarǵa Astana qalasynyń sottarynda memlekettik tildi qoldaný aıasyn keńeıtý jáne damytý jumystaryn úılestirý komıssııasynyń tóraǵasy, sýdıa Aısulý Slambekova jaýap berdi.&nbsp;</p>

«Qazir memlekettik tilde is júrgizý jumystary birneshe baǵytta júrgizilip jatyr. Ol qylmystyq, quqyqbuzýshylyq, azamattyq jáne ákimshilik. 2022 jylǵy 14 jeltoqsanda elordada qylmystyq jáne ákimshilik quqyq buzýshylyq týraly isterdi qaraıtyn aýdandyq sottarǵa memlekettik tildi qoldaný jóninde algorıtm joldandy. Algorıtm boıynsha sýdıa orys tilinde túsken isti aıyptalýshynyń ulty qazaq bolsa, ana tilinde is júrgizý quqyǵyn túsindirip, kelisken jaǵdaıda qazaq tiline ótýi qajet», - dedi Aısulý Slambekova elordada ótken jıynda.

Onyń aıtýynsha, kóp jaǵdaıda, aıyptalýshy eki tildi de túsingenimen, sotta ana tilinde jaýap berýdi suraıdy. Sondyqtan is boıynsha tergeý materıaldaryn qazaq tiline aýdarýdyń qajettiligi joq.

Odan ári sýdıa ótken jylǵy statıstıka men tergeýshilerdiń is júrgizý tiline toqtaldy.

«Qylmystyq ister boıynsha 2023 jyly qazaq tilinde túsken jáne orys tilinen qazaq tiline aýystyrylǵan isterdiń ortasha kórsetkishi 26 % nemese árbir 4-shi qylmystyq is qazaq tilinde qaralǵan. Oǵan tikeleı yqpal etip jatqan sottardyń til máselesine qatysty jeke qaýly shyǵarylýy. Jasyratyny joq, tergeýshilerdiń deni ulty qazaq bola tura, ana tilin jetik bilmegendikten, ózine yńǵaıly bolý úshin kúdiktiden isti oryssha júrgizý týraly aryz jazdyryp alady. Al, sotta sýdıa jaýap ala bastaǵan kezde, aıypty orys tilinde jaýap bere almaı qınalady. Sondyqtan, sýdıa eń birinshi osy máseleni sheship alýy tıis», - deıdi ol.

Aıta keteıik, búgin Astanada qalalyq sottyń uıymdastyrýymen «Sot tóreligin memlekettik tilde júzege asyrý máseleleri» atty dóńgelek ústel ótti. Sharaǵa sýdıalar, advokattar, Májilis depýtattary men til mamandary qatysty.