Astanada árbir kóshettiń pasporty bolýy múmkin

ASTANA. QazAqparat - Astanada aǵash-kóshetterdiń reestrin qurý usynyldy. Bul týraly 21 aqpan kúni bıýdjet, ekonomıka, ónerkásip jáne kásipkerlik máseleleri boıynsha qalalyq máslıhattyń turaqty komıssııasynda elorda boıynsha revızııalyq komıssııanyń tóraǵasy Ǵalymjan Moldash aıtty, dep habarlaıdy QazAqparat Elorda Info saıtyna silteme jasap.

«Astana qalasynda otyrǵyzylǵan kóshetterdiń sany men quramy týraly keshendi málimetter joq», - dedi Ǵalymjan Moldash.

Onyń aıtýynsha, tıisti eseptiń bolmaýy bıýdjet qarjysyn jáne memleket aktıvin tıimdi paıdalanýda óz áserin tıgizip otyr. Al jekelegen jaǵdaılarda olardyń shyǵynyna alyp kelýde.

«Mysalǵa, Almaty aýdanynda quzyrly organnyń tıisti ruqsatynsyz 3350 aǵash súrildi. Bul rette, shyǵynnyń qunyna baǵa júrgizý múmkin emes. Sebebi joıylǵan aǵashtar balansta joq», - dedi ol.

Revızııalyq komıssııa tóraǵasynyń sózine súıensek, mundaı tizilim aǵashtar men kóshetterdi kútip-baǵýǵa jumsalatyn shyǵyndy anyqtaýǵa múmkindik berer edi.

«Bylaısha aıtqanda, bul árbir aǵashtyń pasporty. Onda onyń túri boıynsha ereksheligi, tamyr júıesi, bıiktigi jáne taǵy basqasy jazylady. Bul ǵylymı qujat dese bolady. Aǵashqa nomer men shtrıh-kod beriledi. Tizilimge qarap, tyńaıtqyshqa, sýarýǵa, qandaı da bir reagentterge jumsalatyn shyǵyndardy eseptep shyǵarýǵa bolady. Tizilim bolsa, barlyq shyǵyndardy esepteýde ashyqtyq bolar edi», - dedi Ǵalymjan Moldash.

Onyń atap ótýinshe, aǵashtardyń tizilimi Qazaqstan zańnamasynda jazyp kórsetilgen. Biraq bul jumystyń atqarylýyna kim jaýap berýi tıistigi belgisiz.