Astanada AÓSShK shtab-páteriniń jańa ǵımaraty salynady
Bul jobanyń alǵashqy alǵysharttary osydan eki jyl buryn jasalǵan bolatyn. QR Prezıdenti Qasym-Jomart Toqaevtyń tapsyrmasy boıynsha Astana qalasynyń ákimdigi shtab-páter ǵımaratynyń qurylysyna elordanyń jańa damyp kele jatqan jáne perspektıvaly bóliginde jer ýchaskesin bólgen edi. Azııadaǵy ózara is-qımyl jáne senim sharalary jónindegi keńesti transformatsııalaý týraly sheshimdi iske asyrý maqsatynda AÓSShK Bas hatshysy Qaırat Sarybaı jáne «Sensata Group» kompanııalar tobynyń basshylyǵy AÓSShK shtab-páteri ǵımaratynyń qurylysy týraly úshjaqty memorandýmǵa qol qoıǵan-dy. Astana qalasynyń ákimdigi osy kelisimniń taǵy bir qatysýshysy ekenin atap ótken jón.
Búgin jańa ǵımarattyń irgetasyn qalaý rásiminde AÓSShK hatshylyǵynyń bolashaq qyzmetkerlerine joldaý retinde sanalatyn «ýaqyt kapsýlasy» salyndy.
Aıta keteıik, ǵımarat 4 qabattan turady. Jalpy aýdany 4 myń sharshy metrdi quraıdy. Bul ǵımarattyń basty artyqshylyǵy kópfýnktsıonaldy zal bolady. Onda basqarý organdary da, konsýltatıvtik sıpattaǵy organdar da bas qosa alady. Munda kóptegen konferentsııalar, semınarlar, oqytý protsesteri ótkizilmek.
«25 jyldan keıin áriptesterimiz bul kapsýlany ashyp, uıymymyzdyń búgingi tynys-tirshiligimen tanysa alady dep úmittenemin. Meniń oıymsha, 25 jyldan keıin bizdiń izbasarlarymyz kelesi 25 jylǵa óz jazbalaryn jaza alady jáne bul estafeta urpaqtan-urpaqqa jalǵasady. Uıymnyń jumysy júıelenip, damýdyń dańǵyl jolyna túskenin kórip otyrmyz. Búginde jahanda Azııanyń róli aıtarlyqtaı artyp kele jatqanyn atap ótken jón», - dedi AÓSShK Bas hatshysy Qaırat Sarybaı.
Óz kezeginde QR Syrtqy ister mınıstriniń orynbasary Álibek Baqaev aıtýly oqıǵanyń mańyzdylyǵyn atap ótti.
«Azııadaǵy ózara is-qımyl jáne senim sharalary keńesiniń jańa derbes shtab-páteriniń «alǵashqy tasyn qalaý» rásimi qutty bolsyn! Qazaqstannyń Azııa keńesin shaqyrý bastamasy, búgin óziniń jańa, maqtan tutarlyq qadamyn basýda. Bul is-shara Memleket basshysy Qasym-Jomart Toqaev bergen Azııa keńesine shtab-páterin salý boıynsha tapsyrmasynyń oryndalýy jáne jeke qoldaýynyń kórinisi. Osy rette, Azııa keńesine múshe memleketterdiń jáne Bas hatshysy Qaırat Shorauly basqaratyn Azııa keńesi Hatshylyǵynyń qosyla júrgizgen dáıekti jumysyna rızashylyǵymyzdy bildiremiz», - dedi ol.
Aıta keteıik, qurylysqa jaýapty kompanııa ǵımaratty eń ozyq jasyl tehnologııalarmen jabdyqtaýǵa ýáde bergen. Tipti, jańa shtab-páter Qazaqstan astanasynyń sáýletindegi kórnekti ǵımarattardyń biri bolatynyna sendirip otyr. Ázirge AÓSShK Astana halyqaralyq qarjy ortalyǵynda ornalasqan.