Astanada Amsterdam alańy ashyldy
Bul – Mark Rıýtteniń Qazaqstanǵa jasaǵan úshinshi jumys sapary. Onyń Astanaǵa alǵashqy sapary sonaý 2010 bolǵan. Odan keıin Qazaqstanǵa 2015 jyly kelgen.
«Ár kelgen saıyn kórsetilgen iltıpat pen qonaqjaılylyq úshin raqmet. Astanaǵa qaıta kelgenime óte qýanyshtymyn. Bul qala óziniń qaınaǵan energııasymen, qarqyndy damýymen jáne tamasha adamdarymen meni ár ýaqytta tańǵaldyrady. Búgin osy shaharda bolý men úshin úlken mártebe! Bul kún Qazaqstan men Nıderland arasyndaǵy berik baılanysty aıqyndap tur. Bizdiń yntymaqtastyǵymyz tek úkimettik ortada ǵana emes, sonymen qatar sý resýrstaryn basqarý salasynda da birte-birte jaqsaryp keledi. Biz eki eldiń turǵyndary arasynda iskerlik pen ujymdyq jumysty damytýǵa yqpal etetin dostyq qarym-qatynas ornatqanymyzǵa qýanyshtymyz. Osyndaı dostardyń qatarynda bolǵanymdy maqtan tutamyn. Osy erekshe kún úshin taǵy da alǵysymdy bildirgim keledi», - dedi Mark Rıýtte alańnyń ashylý saltanatynda.
2015 jyldyń kúzinde Nıderlandtyń eń iri qalalarynyń biri Rotterdamda Astana alańy ashylǵan bolatyn. Premer-Mınıstrdiń orynbasary – Úkimet apparatynyń basshysy Ǵalymjan Qoıshybaev atap ótkendeı, búgingi is-shara elder arasyndaǵy dostyq qarym-qatynastyń taǵy bir dáleli.
«Astanada Amsterdam alańynyń ashylýy – Nıderlandtyń Qazaqstanmen yntymaqtastyǵyndaǵy mańyzdy oqıǵa. Halyqtar arasyndaǵy berik baılanysty rastaıtyn jáne elder arasyndaǵy mádenı almasýǵa járdemdesetin oqıǵa. Biz yntymaqtastyqty joǵary baǵalaımyz. Sonymen qatar Nıderlandtyń sý tasqynyna qarsy kúreste alǵashqylardyń biri bolyp kómek qolyn sozǵanyn atap ótkim keledi. Nıderland – bizdiń ekonomıkaǵa eń iri ınvestor. Jyldar ótken saıyn yntymaqtastyǵymyz nyǵaıa túsedi dep senemin», - dedi Ǵalymjan Qoıshybaev.
Foto: Soltan Jeksenbekov/Kazinform Foto: Soltan Jeksenbekov/Kazinform