Astanada alyptar saıysy ótedi, júlde qory – 2 mln teńge
«Elordanyń 25 jyldyǵyna oraı, qalalyq «Tolaǵaı» alyptar saıysy ashyq týrnıri ótedi. Uly dalanyń batyrlaryn nasıhattaýda, qazaqtyń etno-oıyndaryn dáripteý maqsatynda ótetin týrnırge bilegi toqpaqtaı, jaýyryny qaqpaqtaı 18 jastan asqan qala turǵyndary men qonaqtary qatysa alady. Týrnırdiń ótetin jeri – Ortalyq saıabaqtyń avtoturaǵy. Sharanyń ashylý saltanaty 6 shilde kúni saǵat 16:00-de bolady. Jarystyń jalpy júlde qory – 2 mıllıon teńge», - dedi Astana qalasy dene shynyqtyrý jáne sport basqarmasy basshysynyń orynbasary Erkeǵalı Kárbozov qalalyq ortalyq kommýnıkatsııalar qyzmeti alańynda ótken baspasóz máslıhatynda.
Sondaı-aq, spıker basqa da irili-usaqty sporttyq sharalardyń ótetindigin aıtty.
«9 shilde kúni Amfıteatr aldynda «Qajymuqan joly» mádenı-sporttyq jobasy, 9 jáne 19 shilde kúnderi «Astana zhuldyzdary» halyqaralyq shahmat týrnıri ótpek. Odan bólek, qala kúnine arnalǵan balalar, jasóspirimder, jastar jáne ardagerler arasyndaǵy shınkıokýshınkaı karateden «Astana kýbogy» respýblıkalyq týrnırin ótkizý josparda», - deıdi ol.