Astanada «Altyn saqa» respýblıkalyq týrnıri ótedi

ASTANA. QazAqparat - 1 jeltoqsanda «Saryarqa» velotreginde Tuńǵysh Prezıdent kúnine oraılastyrylǵan «Altyn saqa» respýblıkalyq týrnıri ótedi, dep habarlaıdy QazAqparat tilshisi.

Týrnır saǵat 11:00-de bastalady.

«Bul jarys dástúrli túrde ekinshi ret ótkizilip otyr. Jarysqa asyq atý sportynan Qazaqstan qurama komandasynyń, oblystyq komandalar músheleri jáne oıynǵa qyzyǵýshylyq tanytqan daıyndyǵy jáne medıtsınalyq anyqtamasy bar sportshylar qatysady. Jarys bestaban (erler) , bes asyq nemese qaqpaqyl (áıelder) erejesi boıynsha ótedi», - dep habarlaıdy QR Mádenıet jáne sport mınıstrligi Sport komıtetinen.

Jarysqa elimizdiń óńirlerinen kelgen asyq atýdan birneshe dúrkin chempıondary, halyqaralyq týrnırlerdiń jeńimpazdary qatysady dep kútilýde. Jarysqa medıtsınalyq anyqtamasy bar 17 jastan asqan sportshylar qatystyrylady. Júlde qory - 2 mln teńge.

Týrnırdi Qazaqstan Respýblıkasynyń Mádenıet jáne sport mınıstrligi, Ulttyq sport túrleri Qaýymdastyǵy, Asyq atý Federatsııasy uıymdastyryp otyr.