Astanada alıment tólemegen 600 adam izdeýde júr

ASTANA. QazAqparat – Astana turǵyndary arasynda alıment tólemderi boıynsha 2 mlrd 900 mln teńge bereshek bar, dep habarlaıdy QazAqparat tilshisi.

Búgingi tańda Astananyń jeke sot oryndaýshylarynda 19 myńnan astam atqarýshylyq qujat bar. Olardyń 10 myńy merzim-merzimimen oryndalady, ıaǵnı qaryz jalaqydan ustalady jáne aı saıyn alıment óndirip alýshylarǵa beriledi. Al, 618 boryshker izdestirilip jatyr, osyǵan baılanysty atqarýshylyq is júrgizý toqtatyldy

, - dedi Astananyń jeke sot oryndaýshylary óńirlik palatasynyń basshysy Ádilet Beısenbaev Astana kommýnıkatsııalar qyzmetinde ótken baspasóz máslıhatynda.

Spıkerdiń aıtýynsha, 2 myńnan astam problemalyq qujattar bar, ıaǵnı túrli sebeptermen alıment tólemderi jasalmaıdy. Negizinen boryshkerlerde jumys joq, tólemge qabiletti emes jáne basqa da sebepter bar.

Bıylǵy jyl basynda alıment tólemderin óndirý boıynsha bereshek 3 mlrd teńgeden asty. Qazir bul kórsetkish 2 mlrd 900 mln teńgege deıin tómendedi. Jyl basynan beri 79 boryshker ákimshilik jaýapqa, altaýy qylmystyq jaýapqa tartyldy.

Turaqty jumys orny joq boryshkerler úshin jyl basynan beri on shaqty bos oryndar jármeńkesi ótkizildi. Nátıjesinde tek 21 boryshker jumysqa ornalasty. Onyń da kóptegen sebepteri bar: mamandyq sáıkes kelmeıdi, usynylǵan jalaqy nemese laýazym úshin jumys isteýge nıet joq

, - dep tolyqtyrdy spıker.