Astanada áleýmettik mańyzy bar taýarlardyń baǵasy 0,9%-ǵa tómendedi

<p>ASTANA. KAZINFORM - Jyl basynan beri Astanada áleýmettik mańyzy zor taýarlar baǵasy 0,9%-ǵa tómendep, baǵa ındeksi 99,1% qurady (2023 jyldyń sáıkes kezeńinde - 107,2%). Oǵan birinshi sortty bıdaı uny, kúrish, qaraqumyq, kúnbaǵys maıy, sıyr eti, taýyq eti, qyryqqabat, qant jáne tuz sııaqty ónimderdiń baǵasynyń tómendeýi sebep boldy, dep habarlaıdy Saýda jáne ıntegratsııa mınıstrliginiń baspasóz qyzmeti.</p>

Astana qalasy boıynsha Saýda jáne tutynýshylardyń quqyqtaryn qorǵaý departamentimen jergilikti atqarýshy organdarmen birlesip, áleýmettik mańyzy zor taýarlar baǵasynyń ósý qarqynyn tejeý úshin tıisti jumystar júrgizilýde.

Saýda jáne ıntegratsııa mınıstrligi óńirlerdegi áleýmettik mańyzy zor taýarlarǵa baǵa belgileý máselesi boıynsha memlekettik organdardyń jumysyn úılestiredi. Qazaqstan Respýblıkasynyń «Saýda qyzmetin retteý týraly» Zańymen áleýmettik mańyzy zor taýarlarǵa shekti saýda ústemesiniń mólsheri engizilgen, satýshynyń marjasy óndirýshiniń satý baǵasynyń nemese kóterme jetkizýshiden satyp alý baǵasynan 15%-dan aspaýy kerek.

Jyl basynan beri Astana qalasy boıynsha Saýda jáne tutynýshylardyń quqyqtaryn qorǵaý departamenti saýda qyzmeti týraly zańnamany buzǵany úshin 305 kásipkerge ákimshilik shara qoldandy, onyń 40-y 3 mıllıon 205 myń teńge kólemindegi aıyppul tóledi. Aıyppulǵa ilikken iri saýda nysandarynyń ishinde elordadaǵy «Vkýsmart», «Galmart», «Astyqjan» jáne «Destkıı mır» saýda jelileriniń dúkenderi bar.

«Jergilikti atqarýshy organ men Departament saýda sýbektileri arasynda áleýmettik mańyzy zor taýarlar baǵa saıasatyna qatysty zań talaptary boıynsha turaqty túrde aqparattyq-túsindirý jumystaryn júrgizedi»,-delingen habarlamada.