Astanada álemniń áskerı orkestrleri óner kórsetedi
6 shildeden bastap, úsh kún qatarynan, qalanyń ártúrli alańdarynda Ázerbaıjan, Úndistan, Qytaı, Reseı, Túrkııa, Ózbekstan jáne Japonııa Qarýly kúshteriniń mýzykalyq ujymdary óner kórsetetin bolady. Pákistan delegatsııasy baıqaýshy retinde kelmek.
Qazaqstan atynan Memlekettik kúzet qyzmetiniń Prezıdenttik orkestri, Qarýly kúshter Ulttyq áskerı-patrıottyq ortalyǵynyń Ortalyq áskerı orkestri jáne Ulttyq ulannyń úlgili-kórsetilimdi orkestri qatysady.
5 shilde kúni saǵat 12.00-de Ortalyq kommýnıkatsııalar qyzmetinde Qorǵanys mınıstrliginiń ókilderi ótkiziletin is-sharanyń erekshelikteri men maqsattary týraly egjeı-tegjeıli aıtyp beredi.
Kórsetilimderdi Band Marathon bastaıdy. Ol 6 shildede saǵat 19.30-da Esil ózeniniń jaǵasyndaǵy jazǵy amfıteatrda ótedi.
7 shilde saǵat 20.00-de elordanyń túrli alańdarynda ótetin shoýdyń qoıylymy qala turǵyndary úshin erekshe syılyq bolmaq. Ortalyq saıabaqta Qazaqstan Prezıdenttik orkestri men Úndistan, Ózbekstan jáne Japonııanyń áskerı ujymdary óner kórsetedi. «Báıterek» monýmentinde Qazaqstan, Reseı jáne Túrkııa qorǵanys mınıstrlikteriniń orkestrleri óz baǵdarlamalaryn usynady. Al «Han Shatyr» saýda-oıyn-saýyq ortalyǵynda Ázerbaıjan, Qytaı jáne Qazaqstan Ulttyq ulanynyń okestrleri óner kórsetpek.
Іs-sharalar 8 shildede «Barys Arena» muz saraıynda ótetin gala-kontsertpen aıaqtalady. Bastalýy saǵat 12.00-de. Onda kórermender orkestrler defılesi, olardyń birlesken qoıylymdary jáne mýzykalyq tosynsyılary bar qyzyqty mýzykalyq-teatrlandyrylǵan qoıylymnyń kýási bolady.
Ázerbaıjan Respýblıkasy Geıdar Alıev atyndaǵy áskerı ınstıtýty orkestriniń repertýarynda zýrna men balabannyń sıqyrly dybystary bar armııa sherýleri men ulttyq áýender bar. XIV ǵasyrǵa deıin Ázerbaıjan óneri Taıaý Shyǵys halyqtarynyń mýzykalyq dástúrlerimen tyǵyz baılanysty boldy. Muny Shyǵys mýzykasynan habary bar sezimtal kórermen birden ańǵarmaq.
Úndistan Áskerı-áýe kúshteri orkestriniń mýzykanttary kórermendi túrli tústi, erekshe formasymen jáne kompozıtsııalarynyń ereksheligimen tańǵaldyratyn bolady. Onda dástúrli eýropalyq aspaptardyń dybysy úndi sıtary men sarodyna basa nazar aýdarylady.
Halyqtyń baı mádenı tájirıbesin mura etken Qytaı Halyq-azattyq armııasy áskerı orkestriniń qoıylymynda tyńdaýshylar ejelgi mýzykalyq dástúrlerdi de, orkestr óneriniń qazirgi tendentsııalaryn da túsine alady.
Saptyq, klassıkalyq jáne djaz áýenderimen Reseı Qorǵanys mınıstrligi Batys áskerı okrýginiń 23-shi áskerı orkestri óner kórsetedi. Orys mýzykanttarynyń oryndaý tásili sheberlikpen, ıntonatsııanyń tazalyǵymen jáne názik nıýanstarymen erekshelenedi.
Túrkııanyń san ǵasyrlyq mýzykalyq dástúrleri «Mehteran» áskerı orkestriniń oryndaýshylyq mádenıetinen baıqaldy. Túrik áskerı mýzykasy eýropalyq áskerlerdiń bravýr marshyna áste uqsamaıdy. Ataqty Motsarttyń «Túrik marshy» da halyqaralyq festıval baǵdarlamasynda mindetti túrde oryndalatyny kóńil qýantady.
Ózbek kerneıiniń dybysy da qazaqqa jaqyn. Bul baýyrlas halyqtardyń mýzykalyq dástúrleriniń jaqyndyǵyn kórsetedi.
Taıko barabandary – japon áskerı orkestrin tanymal etip kele jatqan dástúrli aspap. Ejelgi nanym boıynsha, olar shaıqasta jaýdyń úreıin ushyryp, komandalardy jetkizip, jaýyngerlik manevrlerdi úılestirgen. Festıvalde Japonııanyń Ózin-ózi qorǵaý teńiz kúshteriniń «Tokıo bend» orkestri astanalyqtarǵa ejelgi áskerı mýzyka men zamanaýı marshtardyń úlgilerin usynbaq.
Astana kúnine oraı uıymdastyrylǵan halyqaralyq áskerı orkestrler festıvali Qazaqstannyń yntymaqtastyq pen tatý kórshilikke degen umtylysyn kórsetedi. Mýzyka men óner tili qýatty biriktirýshi kúsh retinde qyzmet etedi.