Astanada «Álemdi ózgertetin ıdeıalar» jobasynyń alǵashqy qatysýshylary arnaıy sertıfıkattarǵa ıe boldy (FOTO)
Astanada 9-10 synyp oqýshylary men 1-2 kýrs stýdentteri birneshe kún boıy «Ult Jospary - Memleket basshysy Nursultan Ábishuly Nazarbaevtyń bes ınstıtýtsıonaldyq reformasyn júzege asyrýdyń 100 naqty qadamy» kýrsynan ótken bolatyn.
Sertıfıkattar men estelik syılyqtardy mektep oqýshylaryna QR Prezıdenti Keńsesiniń basshysy - «Qazaqstan Respýblıkasynyń Tuńǵysh Prezıdenti - Elbasynyń kitaphanasy» MM dırektory mindetin atqarýshy Mahmut Qasymbekov tapsyrdy.
Astana qalasy mektepteri 9-10 synyptarynyń 50 oqýshysy eki kún boıy otandyq belgili ǵalymdar, ǵylym doktorlary, professorlar ótkizgen semınar-trenıngke qatysyp, «Kásibı memlekettik apparat qurý», «Zańnyń ústemdigin qamtamasyz etý», «Indýstrıalandyrý jáne ekonomıkalyq ósim», «Birtutas bolashaq ulty», «Esep beretin memleketti qalyptastyrý» taqyryptarynda avtorlyq dárister kýrsyn oqydy.
«Memleket deńgeıindegi kóptegen is-sharalar qalaı iske asyp jatyr, mundaı reformalar kimder úshin kerek, osyny oqýshylar, stýdentter, jas balalar qalaı biledi eken degen oımenen bizder osy kitaphananyń múmkindigin paıdalanyp, Qazaqstan boıynsha semınar-trenıngter ótkizýdi josparladyq. Bul sharaǵa Qazaqstannyń búkil aımaqtaryndaǵy mektep oqýshylary keletin bolady. Ylǵı oqý ozattary men aldyńǵy qatarly, belsendi balalardy jınaımyz. Onymen qosa, barlyq joǵary oqý oryndarynyń 1-2 kýrsynyń stýdentterin osynda shaqyryp otyrmyz. Ondaǵy bizdiń maqsat - Elbasymyzdyń quryp otyrǵan Josparyn sizderge túsindirý», - dep atap ótti M.Qasymbekov.
«Álemdi ózgertetin ıdeıalar» bilim berý jobasy Memleket basshysy N.Nazarbaevtyń bes ınstıtýtsıonaldyq reformasyn júzege asyrýǵa arnalǵan «100 naqty qadam» Ult josparyn, jahandyq bastamalary men kontseptýaldyq ıdeıalaryn zertteýge baǵyttalǵan. Eki kúndik semınar 2016 jyldyń shildesine deıin júrgiziledi. Osy aralyqta 3 myńnan astam oqý ozattary trenıngter ótpek.