Astanada aldaǵy mereke kúnderi qandaı sharalar ótedi
Astana qalasy Mádenıet jáne sport basqarmasynyń baspasóz qyzmeti taratqan aqparatqa súıensek, 7, 8 jáne 9 mamyrda Astana turǵyndary men qonaqtarynyń nazaryna merekelik baǵdarlama usynylady. Sharalar ashyq alańdarda, kontsert zaldary men teatrlarda ótedi.
Otan qorǵaýshy kúnine oraı 7 mamyrda qalalyq alańda (ákimdiktiń aldyndaǵy alań, Beıbitshilik k-si, 11) qazaqstandyq estrada juldyzdarynyń qatysýymen ashyq aspan astynda úlken kontsert ótedi. Merekelik shara saǵat 13:00-de bastalyp, saǵat 23:00-ge deıin jalǵasady. Móldir Áýelbekova, Dastan Orazbekov, Beıbit Qorǵan, Serik Ibragımov, Adam, «Art Dombyra» jáne «Melomen» toptary jáne t.b. ónerpazdar kelýshilerge kóterińki kóńil kúı syılaıdy.
Jeńis kúnine arnalǵan sharalar 8 jáne 9 mamyrda ótedi.
8 mamyrda saǵat 10:00-de Ortalyq qalalyq zıratta Ekinshi Dúnıejúzilik soǵys jyldary alǵan jaraqattardan kóz jumǵan aqmolalyq jaýyngerlerdiń qabirine Dańq gúl destesin qoıý saltanaty ótedi. Osy kúni «Astana» kontsert zalynda «Uly jeńis kúni» atty merekelik kontsert kópshilik nazaryna usynylady. Mádına Sádýaqasova, Rýstem Nurjigit, Meıir Baınesh, Dınaıa jáne t.b. óner juldyzdary sharaǵa arnaıy shaqyrylǵan qonaqtar - Uly Otan soǵysy ardagerlerine arnap saǵys jyldaryndaǵy ánderdi oryndaıdy. Sondaı-aq, kontsertke elordalyq «Jastar» teatrynyń artısteri qatysady.
9 mamyrda «Otan qorǵaýshylar» monýmentine «Dańq gúldestesin» qoıý saltanaty ótedi. Sodan keıin Stýdenttik saıabaqta 11 áskerı palatadan qurylǵan qalashyqta ardagerler men tyl eńbekkerlerine arnap merekelik dastarqan jaıylady.
Jeńis kúnin merekeleý Stýdenttik saıabaqta (Orbıta aýdany) jáne qalalyq alańda jalǵasady. Belgili qazaqstandyq estrada ánshileri soǵys jyldaryndaǵy ánderdi oryndaıdy. Elorda turǵyndary men qonaqtary kontsertti tamashalaı alady.
Sharalardyń tolyq tizimi www.madeniet.astana.kz saıtynda jarııalanǵan.