Astanada áli 2800 oryn aqyly turaqqa aınalady — ákimdik

<p>ASTANA. KAZINFORM &mdash; Astana qalasyndaǵy aqyly turaq oryndarynyń sany 10 myńǵa deıin jetkiziledi. Bul týraly qalalyq kólik jáne jol-kólik ınfraqurylymyn damytý basqarmasy Kazinform saýalyna joldaǵan jaýapta osyndaı málimet aıtty.</p>

«Memleket-jeke menshik áriptestiginiń shartyna sáıkes 10 000 aqyly turaq oryndaryn iske qosý kózdeledi. Búgingi tańda 7 200-den astam aqyly turaq engizildi. Aqyly turaqtar áleýmettik nysandar men úılerdiń aýla aýmaqtarynyń janynda ornatylmaıdy», - dep jazylǵan basqarma jaýabynda.

Basqarma mamandarynyń aıtýynsha, aqyly turaqqa tólengen aqshanyń 25 paıyzy qala bıýdjetine túsip jatyr. Mundaı prıntsıp 2038 jylǵa deıin jumys isteıdi dep aıqyndalǵan.

«Kiristi bólýge kelsek, memleket-jeke menshik áriptestiginiń shartyna sáıkes, 2018 jylǵy qarashadan 2022 jylǵy qarashaǵa deıin memlekettiń úlesi 5%, jeke áriptestiń úlesi 95% bolǵan. 2022 jylǵy jeltoqsannan 2038 jylǵy qarashaǵa deıin memlekettik serikteske 25%, jeke serikteske 75% úles belgilengen. Sondaı-aq, aqyly turaq qyzmetterin tóleýden jaltarǵany úshin salynatyn aıyppuldan túsken aqshanyń bári qala bıýdjetine túsedi», - dep jazady ákimdiktegiler.

Eske sala keteıik, buǵan deıin Májilis depýtaty Ashat Aımaǵambetov Astanadaǵy aqyly turaqtardyń máselesin retteýdiń jolyn aıtqanyn jazǵan bolatynbyz.