Astanada aqyldy elektrondy taqta tanystyryldy
Aıaldamada ornatylǵan elektrondy taqtanyń ereksheligi sol, birneshe qyzmet túrin usynady. Atap aıtqanda - avtobýstar kestesi, qala boıynsha bos jumys oryndary jáne taksı qyzmeti.
«Bul «Aqyldy aýdan» jobasynyń aıasynda júzege asyrylatyn birneshe jobanyń biri. Ázirge pılottyq nusqa retinde bir jerde ǵana ornatýdamyz, sátti júzege asyrylsa aldaǵy ýaqytta qala boıynsha ornatylatyn bolady. Jáne taqtanyń jumysyn jetildiretin bolamyz.Taǵy bir aıtyp keterligi, elektrondy taqtany ózimizdiń otandyq IT mamandary jasap shyǵardy. Sol sııaqty memlekettik bıýdjetten eshqandaı qarajat jumsalmady, ıaǵnı jeke ınvestorlyq esepten júzege asyrylýda», - dedi «Astana Innovations» AQ basqarma tóraǵasy Oljas Sartaev.
Onyń aıtýynsha, «Aqyldy aýdan» jobasyn júzege asyrý negizgi úsh baǵyttan turady, aldymen smart tehnologııa, ekinshi ekologııalyq problemany sheshý jáne ýrbandyq máselelerge jaýap berýi tıis.
«Bizdiń mınıstrlik Astana Innovations-men birneshe jobalardy qolǵa alýda. Búgin sonyń birin tanystyrýdamyz. Bul jerde avtobýs kestesinen bólek, jumys izdeýshiler enbek.kz saıtynyń qyzmetin paıdalana alady. Endigi másele turǵyndardyń taqtany qajetine paıdalanýy, bul baǵytta halyq arasynda túsindirý jumystaryn júrgizetin bolamyz»- dedi QR Eńbek jáne halyqty áleýmettik qorǵaý vıtse-mınıstri Narıman Muqyshev.
Uıymdastyrýshylardyń aıtýynsha, elordanyń «Jastar» aýdanynda ornatylǵan elektrondy taqtaǵa aldaǵy ýaqytta basqa da qyzmet túrleri engiziletin bolady.