Astanada Aqseleý Seıdimbek oqýlary ótti
Dástúr boıynsha, qazaqtyń tarıhy men etnografııasyn zertteýde ólsheýsiz eńbekter jazǵan zertteýshiniń týǵan aıy - jeltoqsanda L.N. Gýmılev atyndaǵy Eýrazııa ulttyq ýnıversıtetiniń ǵylymı kitaphanasynyń Aqseleý Seıdimbek atyndaǵy Ǵylym zalynda «Aqseleý Seıdimbek jáne qazaqy bolmys» atty «Aqseleý oqýlary» ótti.
«Aqseleý oqýlarynda» ǵalymnyń ánderi shyrqalyp, ómirde syrlasy, ǵylymda - serikteri, qıyn-qystaý sátterde janashyry bolǵan úzeńgiles adamdar Aqseleý Seıdimbek týraly estelikterin aıtty. «Aqseleý oqýlaryn» uıymdastyryp otyrǵan ýnıversıtettiń Jýrnalıstıka jáne saıasattaný fakýltetiniń dekany Qaırat Saq atap ótkendeı, Aqseleý Seıdimbektiń murasy eshqashan ólmeıdi, kerisinshe, ýaqyt ótken saıyn qazaqtyń ulttyq erekshelikterin zerttegen jas ǵalymdar úshin quny arta beredi.
Sondaı-aq, ol shara barysynda óner kórsetip, Aqseleý Seıdimbektiń ánderin shyrqaǵan, kúılerin shertken stýdentter men oqytýshylarǵa «Uly dalanyń Aqseleýi» atty kitapty tabys etti.
«Ákemiz tórt aǵaıyndy boldy. Aǵalarynyń bári keńsharda turdy. Solardyń balalary bizdiń úıde turyp oqydy. 15-20 shaqty bala bir úıde jatamyz. Ortasynda aǵataıym (Aqseleý Seıdimbek - avtor) bar. Aǵataıym tapqyr edi, búkil oıyndy sol kisi uıymdastyratyn. Qaırat Baıbosynovty bilesizder, sol kisi bizben kórshi turǵan. Keshke mal jaılanǵannan keıin aýyldyń aqsaqaldary jınalyp, Qaıratqa óleń aıtqyzatyn. Bir jyly Júsipbek Elebekov kelgende Qaıratty qolynan jetektep aparyp, tanystyrǵan. Osylaısha, Qaırat Almatyǵa attandy. Aıtaıyn degenim, sol kezde Aqseleý aǵataıym, óleń jazatyn, gazetterge óleńderi shyǵatyn. Aqseleý aǵamnyń jazǵan óleńderin ákeı túzetip otyratyn. Aǵataıym oqý bitirgennen keıin «Lenınshi jas» gazetiniń Qaraǵandy oblysyndaǵy tilshisi bolyp jumysqa ornalasty.
Endi myna «Uly dalanyń Aqseleýi» degen atpen shyqqan kitap jalǵasyn tapsa eken»,-deıdi Aqseleý Seıdimbektiń qolǵanaty bolǵan Asylhan Hasenuly.
«Aqseleý san qyrly, kúrdeli tulǵa. Kúrdeli, iri tulǵany bir kitappen, osyndaı bir oqýlar arqyly tanyp bilý múmkin emes. Aqseleýdiń ómirden ozǵanyna alty jyldan astam ýaqyt boldy. Alty jyldan beri Aqseleý oqýlary úzdiksiz ótip kele jatyr. Óz basym, janynda júrgen dosy retinde Aqseleýdiń bar eńbegi qazaqtyń bolmasyn, halyqtyq qasıetin kórsetýge arnalǵan dep aıtar edim. Aqseleý zertteýleriniń arasynda taý tulǵa bolyp turǵan eńbegi - «Qazaqtyń aýyzsha tarıhy» kitaby. Bizdiń halyq ómir boıy el bolyp qalyptasa bastaǵannan keshegi 20 ǵasyrdyń basyna deıingi klassıkalyq kóshpeli ómir salty birjolata toqtaǵanǵa deıingi kezeńde, handyq bolsyn, qaǵanat bolsyn, ulys bolsyn, qandaı memleket bolmasyn, sol memlekettiń qurylymdyq júıesi - rýlyq taıpalyq júıe boldy. Rýlyq-taıpalyq júıeni Aqseleýdeı ashyp bergen eshkim joq»,-dedi keshti qorytyndylaǵan Aqseleý Seıdimbektiń jaqyn dosy, jazýshy Qoıshyǵara Salǵarauly.