Astanada aǵzaǵa kúshti áser etetin preparatty zańsyz satqan 2 dárihana jabyldy

ASTANA. QazAqparat – Jyl basynan beri Astanada kúshti áser etetin preparattardy satyp kelgen 4 dárihananyń basshysy jaýapqa tartyldy. Astana qalalyq polıtsııa departamentiniń esirtki qylmysyna qarsy is-qımyl basqarmasynyń bastyǵy Rýstam Ǵazızov osylaı málim etti, dep habarlaıdy QazAqparat tilshisi.

«Esirtki qylmystaryn anyqtaýda elorda turǵyndary belsendilik tanytýda. Turǵyndardan túsken aqparat negizinde esirtki zattaryn satýmen aınalysyp kelgen 52 saıt buǵattaldy. Sonymen qatar, qala aýmaǵyndaǵy psıhotroptyq zattardy jarnamalaıtyn sýretter óshirildi», - dep málim etti Rýstam Ǵazızov.

Basqarma basshysy elordalyq dárihanalar arqyly kúshti áser etetin preparattardyń taralýy azaımaı turǵanyn atap ótti.

«Jyl basynan beri polıtsııa departamenti men medıtsınalyq jáne farmatsevtıkalyq baqylaý komıteti birlesip, Ákimshilik quqyq buzýshylyq kodeksiniń 426-baby (Farmatsevtıkalyq qyzmettiń jáne dárilik zattar men medıtsınalyq buıymdardyń aınalysy salasynyń qaǵıdalaryn buzý) boıynsha 4 faktini anyqtady. 2 fakti boıynsha jeke kásipkerlerge 345 000 teńge kóleminde aıyppul salyndy. Al qalǵan 2 dárihana mundaı quqyq buzýshylyqty qaıtalap jasaǵany úshin 6 aı merzimge jabyldy», - dedi Rýstam Ǵazızov.

Sonymen qatar, ol jyl basynan beri Astana aýmaǵynda 362 esirtki qylmysy tirkelip, 14 keli «sıntetıka» tárkilengenin aıtty.