Adam papıllomavırýsyna qarsy vaktsınatsııa júrip jatyr

<p>ASTANA. KAZINFORM &mdash; Elordada adam papıllomavırýsyna (APV) qarsy vaktsınatsııa naýqany bastaldy. Bul shara qyzdardyń densaýlyǵyn qaterli isiktiń eń qaýipti túrleriniń birinen qorǵaýǵa baǵyttalǵan, dep jazdy elorda ákimdiginiń resmı saıty.</p>

Qazirgi ýaqytta qalada vaktsınanyń 12 myńnan astam dozasy bar. Josparly tártippen vaktsınatsııalaýǵa qala boıynsha barlyǵy 13 myńǵa jýyq 11 jastaǵy qyzdar jatady. Sondaı-aq 12-13 jas aralyǵyndaǵy qyzdarǵa tolyqtyra ımmýndaý qarastyrylǵan.

Vaktsınatsııa mektepterdiń medıtsınalyq kabınetterinde ata-analardyń nemese zańdy ókilderdiń aqparattandyrylǵan kelisimin alǵannan keıin júrgiziledi. Ata-analardyń qalaýy boıynsha vaktsınatsııa tirkelgen jeri boıynsha emhanalarda da júrgizilýi múmkin.

«Men vaktsına týraly medbıkeden alǵan býkletten oqydym. Sodan keıin anamnan suradym, ol kelisti. Búgin vaktsına aldym, aýyrǵan joq, qoryqpadym. Qazir ózimdi jaqsy sezinemin», – dedi №75 mektep-gımnazııasynyń 8-synyp oqýshysy Adel Ýagızova.

APV vaktsınasy óziniń tıimdiligi men qaýipsizdigin halyqaralyq deńgeıde dáleldedi. Búgingi tańda bul vaktsına álemniń 135 elinde qoldanylady, sonyń arqasynda birqatar elde áıelder arasynda APV taralýy búgingi kúni 90%-ǵa tómendedi.

«11 jastan bastap qyzdarǵa APV-ǵa qarsy vaktsınatsııalaýdy bastaý – bizdiń óskeleń urpaqtyń bolashaq densaýlyǵyn qorǵaýdaǵy mańyzdy qadam. Bizdiń maqsatymyz – barynsha qorǵanysty qamtamasyz etý jáne halyq arasynda syrqattanýshylyqty azaıtý. Biz ata-analardy balalaryn qaýipti aýrýlardan saqtaý úshin osy múmkindikti paıdalanýǵa shaqyramyz», – dep atap ótti elordalyq Qoǵamdyq densaýlyq saqtaý basqarmasynyń basshysy Álııa Rústemova.