Astanada Abaı Qunanbaevtyń ózbek tiline aýdarylǵan kitaby tanystyrylady

ASTANA. QazAqparat - Ózbek tiline aýdarylǵan Abaı Qunanbaevtyń kitaby «Eurasian Book Fair - 2018» ІІІ Eýrazııalyq halyqaralyq kitap kórme-jármeńkesinde tanystyrylatyn bolady. Bul jaıynda búgin Ortalyq kommýnıkatsııalar qyzmetindegi baspasóz máslıhatynda «Eýrazııalyq halyqaralyq kitap kórme-jármeńkesi» jobasynyń jetekshisi Raýshan Turlynova aıtty, dep habarlaıdy QazAqparat.

Onyń atap ótýinshe, kórme-jármeńkege keletin delegatsııalar jekelegen, tolyqqandy baǵdarlama da usynatyn bolady.

«Ózbek delegatsııasy «Uly qazaq aqyny ári oıshyly Abaı Qunanbaevtyń shyǵarmashylyq murasy» dep atalatyn kitap stendin daıyndady. Kórmedegi jarqyn sharalardyń biri ózbek tiline aýdarylǵan Abaı Qunanbaev kitabynyń tusaýkeseri bolmaq. Qazirgi ýaqytta ózbek halqy Abaı Qunanbaevty orta ǵasyrdaǵy uly túrki aqyny ári fılosofy Navoımen salystyrady. Sońǵy jyldary ózbek halqy bizdiń mádenıetterimizdiń ózara baılanysyna basa nazar aýdaryp otyr. Ózbekstanda Abaıǵa eskertkish qoıyldy. Aǵymdaǵy jyly olar kitap kórmesin uıymdastyryp, onda Abaıdyń shyǵarmalaryn qoımaq. Sonymen qatar qurmetti qonaq retinde Qazaqstannan da delegatsııa shaqyrýǵa nıet tanytýda», - dedi Raýshan Turlynova.

Esterińizge sala keteıik, «Eurasian Book Fair - 2018» ІІІ Eýrazııalyq halyqaralyq kitap kórme-jármeńkesi sáýirdiń 25-28 aralyǵynda «Kórme» kórme ortalyǵynda jumys isteıdi. Bıylǵy kórme QR Mádenıet jáne sport mınıstrligi men Astana ákimdiginiń qoldaýymen elordanyń 20 jyldyq mereıtoıyna arnalǵan.