Astanada 9 eldiń áskerı orkestrleri mýzykalyq shoý usynady
Festıvalge Ázerbaıjan, Úndistan, Qytaı, Pákistan, Reseı, Túrkııa, Ózbekstan, Tájikstan jáne Japonııa Qarýly kúshteriniń áskerı-mýzykalyq ujymdary, sondaı-aq Qorǵanys mınıstrliginiń, Qazaqstan Respýblıkasy Memlekettik kúzet qyzmetiniń jáne Ulttyq ulannyń áskerı orkestrleri qatysady.
Qorǵanys mınıstrligi men Astana qalasy ákimdigi uıymdastyryp otyrǵan bul shara mádenıetti damytýǵa, beıbitshilik ıdeıalaryn ilgeriletýge jáne halyqaralyq yntymaqtastyqty nyǵaıtýǵa baǵyttalǵan.
«Áskerı orkestrler festıvalin ótkizý týraly usynysymyzǵa 8 el qoldaý bildirdi. Bul olardyń biregeıligin kórsetip, tanymal áýender men kompozıtsııalardy oryndaý arqyly shyǵarmashylyq múmkindigin pash etýge jol ashady. Festıval qyzyqty ótetinine senimdimin», – deıdi Qarýly kúshter Ulttyq áskerı-patrıottyq ortalyǵynyń bastyǵy Qazaqstannyń eńbek sińirgen qaıratkeri Arman Ásenov.
Festıval baǵdarlamasyna sáıkes, 6 shilde kúni saǵat 19.00-den 22.30-ǵa deıin Band Marathon ótedi. Esil ózeni jaǵasyndaǵy jazǵy amfıteatr sahnasynda 500-ge jýyq mýzykant qatysatyn 11 mýzykalyq ujym óner kórsetedi.
7 shilde kúni saǵat 21.00-de Astananyń 5 alańynda áskerı orkestrler jarty saǵatqa sozylǵan «Perfomans shoý» uıymdastyrady: EKSPO aýmaǵynda, «Báıterek» monýmentinde, «Han Shatyr» saýda, oıyn-saýyq ortalyǵynda, ortalyq saıabaqta jáne botanıkalyq baqta.
Іs-sharalar «Barys Arena» kópbeıindi muz saraıynda ótetin (bastalýy saǵat 12.00-de, kirý tegin) «Astana mádenıet kerýeni» gala-kontsertimen aıaqtalady. Onda Elorda qonaqtary men turǵyndary qyzyqty mýzykalyq-teatrlandyrylǵan qoıylymnyń kýási bola alady. Kontsertte áskerı, klassıkalyq, halyqtyq jáne estradalyq áýender shyrqalady. Birlesken nómirler, orkestrler defılesi, sondaı-aq qarýmen kórsetilimdik qoıylymdar uıymdastyrylady. Bul jyldyń eń jarqyn jáne este qalarlyq kórinisteriniń biri bolmaq.