Astanada 7 aılyq náresteniń baýyry almastyryldy, donor – ákesi
«Meniń ulyma baýyr tsırrozy dıagnozy qoıylǵan. Ana men bala ortalyǵynyń dárigerleri transplantatsııany emdeýdiń eń tıimdi ádisi dep aıtty. Árıne, muny estigenimizde balamyzdan aıyrylyp qalamyz ba degen qorqynysh boldy. Jubaıym donor bolýǵa múmkindigi bar ekenin bilgen soń, dárigerlerge senip, barlyq analızderdi birden tapsyryp, daıyndyqty bastap kettik. Operatsııadan aman-esen ótip, bir jeńildep qaldyq. Qorqynysh boldy, biraq senimimiz aldamady. Sondyqtan, balamyzdy aman saqtap qalǵan Ana men bala ortalyǵynyń barsha dárigerine alǵys aıtamyz», - deıdi anasy Qarlyǵash.
Balanyń aǵzasyn aýystyrý úshin Japonııa men Nepaldan mamandar shaqyrtylǵan. Operatsııa «University Medical Center» korporatıvtik qorynyń bazasynda ótkizildi. Transplantattaý barysyna náresteniń jasy (7 aı) men salmaǵynyń azdyǵy (8 kg) áser etip qana qoımaı, sonymen qatar jaǵdaıynyń óte aýyr bolýy, tynys alýynyń buzylýy men basqa da asqynýlar qıyndatty. Degenmen, operatsııa sátti ótip, jaǵdaı turaqtanǵan soń, bala men ákesi aýrýhanadan shyǵaryldy. Qazirgi tańda olardyń jaǵdaıy jaqsy.
Operatsııa «Qazaqstan halqyna» qoǵamdyq qorynyń qoldaýymen Japonııanyń ulttyq densaýlyq jáne damý ortalyǵynyń (Tokıo) organdardy transplantatsııalaý ortalyǵy dárigerlerimen birlesip, «1 jasqa deıingi balalardyń baýyr transplantatsııasy» taqyrybyndaǵy tálimgerlik sheberlik synyby sheńberinde júrgizildi. Shaqyrtylǵan mamandar «University Medical Center» QQ qyzmetkerlerine baýyr transplantatsııasyn júrgizýge muqtaj naýqastardy operatsııa aldyndaǵy daıarlaý, anestezıologııalyq járdem, jedel tehnıka jáne operatsııadan keıingi basqarý taqyryptary boıynsha 3 kún boıy oqytty.
Aıta ketsek, erte jastaǵy naýqastarǵa, ásirese dene salmaǵy 10 kg az balalarǵa baýyr transplantatsııasy jetkilikti daǵdy men tájirıbeniń bolmaýyna baılanysty Qazaqstan Respýblıkasynda júrgizilmeıdi. Sondyqtan, osyndaı oqý, daǵdylar men tehnologııalardy meńgerý derttiń asqyný sanyn azaıtyp, naýqastardyń ómir súrý sapasy men uzaqtyǵyn jaqsartpaq.