Astanada 60 memlekettik balabaqsha salynady

<p>Elorda balabaqshalarynda mektep jasyna deıingi balalardyń kezegi 60 myńnan asty, onyń ishinde 2 jastan 6 jasqa deıingi balalardyń kezek sany 42 myńǵa jetken. Bul týraly elordanyń bilim berý uıymdarynda oqý protsesin uıymdastyrý máseleleri boıynsha ákim orynbasary Eset Baıken aıtty, dep habarlaıdy QazAqparat tilshisi.</p>

«Bul rette ákimdik te birqatar shara qarastyrdy. Memlekettik bilim berý tapsyrysy 4 esege ulǵaıtyldy. Jeke ınvestıtsııalar esebinen 17 balabaqsha salynyp jatyr. 2017 jyldan bastap memlekettik balabaqshalardyń qurylysy toqtatyldy, biraq ákimdik bala týý jáne kóshi-qon protsesterinen mektep jasyna deıingi balalardyń jyl saıynǵy ósýin eskerip, qalanyń Bıýdjettik-ınvestıtsııalyq jobalary aıasynda 60 memlekettik balabaqsha salý týraly sheshim qabyldady», - dedi Eset Baıken Astana kommýnıkatsııalar qyzmetinde ótken baspasóz máslıhatynda.

Halyqtyń áleýmettik osal toptary sanatyndaǵy 8 myń balaǵa balabaqshalarda tegin tamaqtaný uıymdastyrylǵan.

Sonymen birge, elordada 11 qosymsha bilim berý uıymy jumys isteıdi. Bıyl 158 myń bala nemese 79,9% qosymsha bilim berýmen qamtylǵan jáne ótken jylmen salystyrǵanda 7% ósim bar (mektepterde 2188 úıirme men sektsııa jumys isteıdi).

Buǵan deıin spıker Astana mektepterinde 28 myń oryn jetispeýshiligi bar ekenin, bıyl Astanada 16 myń oqýshy syıatyn 11 mektep salynatynyn aıtqan edi.