Astanada 6 jańa avtobýs marshrýty iske qosylady
«Qalada qoǵamdyq kólikke suranys joǵary, turǵyndardyń 48% astamy kóliktiń osy túrin paıdalanady. Qazirgi ýaqytta qala ishinde 6 avtobýs parki bar, onda 1500 júrgizýshi jumys isteıdi, 99 baǵyt boıynsha 1100 avtobýs júredi. Qoǵamdyq kólikti jańǵyrtý jumystary turǵyndardyń syn-eskertpelerine qaraı, úzdiksiz jalǵasýda», - dedi Elorda ákiminiń orynbasary Erlan Bekmyrzaev qalalyq máslıhat otyrysynda.
Spıkerdiń aıtýynsha, sońǵy ret jappaı avtobýs satyp alý 2019 jyly júrgizilgen. Sonda alynǵan 100 elektrobýs qaladaǵy avtobýs jetispeýshiligi máselesin ishinara sheshken.
«Qazirgi ýaqytta 400 avtobýs satyp alý jóninde sheshim qabyldandy. Onyń 55-i qalaǵa jetkizildi, árbir avtobýs parki boıynsha jospar qurylǵan. Sonymen birge, bıyl 6 jańa avtobýs marshrýty qurylady, olar turǵyn alaptarynyń máselesin sheshýge baǵyttalady. Jańa baǵyttar Agroqalashyq, Kóktal-1, Kóktal-2, Úrker, Sh. Aıtmatov, Q. Muhamedhanov, Syǵanaq, Tóle bı kósheleri men Turan, Uly dala dańǵyldaryn, Baǵystan turyǵ alaby, Myńjyldyq alleıasy, ońtústik-shyǵys aýdanyn qamtıdy», - dedi E. Bekmyrzaev.
Sondaı-aq, qala joldaryndaǵy avtobýs jolaqtary óz tıimdiligin kórsetken.
Bıyl taǵy 20 shaqyrym kóshege – Sh. Aıtmatov, Uly dala kóshelerinde, R. Qoshqarbaev, Táýelsizdik, Turan dańǵyldarynda avtobýs jolaqtary syzylady.