Astanada 5G jelisiniń neshe stansasy ornatyldy

<p>Tsıfrlyq damý, ınnovatsııalar jáne aeroǵarysh ónerkásibi mınıstrligi telekommýnıkatsııalar komıteti symsyz baılanys jobalardy damytý jáne monıtorıngileý basqarmasynyń basshysy Oljas Kabenov Astanada 5G júıesin iske qosý barysy jaıynda aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«5G boıynsha Astanada 70-ten astam bazalyq stansa ornatylǵan. Jalpy Qazaqstan boıynsha 600-den astam bazalyq stansa qoıyldy. Bul negizinen adam kóp shoǵyrlanǵan aýmaqtar», — dedi Oljas Qabenov Kazinform tilshisiniń suraǵyna jaýap bere otyryp.

Onyń aıtýynsha, 5G jelisin qaı aýdandarda ornatatynyn baılanys operatorlary ózderi sheshedi.

«Biz operatorlardy qandaı da bir naqty oryndarǵa bazalyq stansa ornatýǵa májbúrlemeımiz, olar bul stantsııalardy ózderi josparlap, ornatady. Atap aıtqanda, qalanyń 75 paıyzdan kem emes aýmaǵyn qamtýdy qamtamasyz etetin jalpy talap qoıyp otyrmyz», — dedi vedomstvo ókili.

Onyń sózine qaraǵanda, jyl aıaǵynda naqty kórsetkishter jarııalanady. Bıylǵy josparda qalanyń 15% qamtý eskerilgen.

Aıta keteıik, bıyl elimizde 5G jańa uıaly baılanys jelisin engizý bastaldy.

Júrgizilgen jumystyń nátıjesinde 2025 jyldyń sońyna deıin respýblıkalyq mańyzy bar qalalar aýmaǵynyń 75 paıyzy, oblys ortalyqtary aýmaǵynyń 60 paıyzy 5G tehnologııasymen qamtamasyz etiledi.

Sonymen qatar, joba aıasynda 2027 jylǵa qaraı respýblıkalyq mańyzy bar qalalardyń 75 paıyzynda, oblys ortalyqtarynyń 60 paıyzynda 5G tehnologııasy qosylady.