Astanada 500-ge jýyq avtobýsta múmkindigi shekteýli jandarǵa jaǵdaı jasalmaǵan

ASTANA. QazAqparat - «Nur Otan» partııasy qoǵamdyq kólikterge arnaıy monıtorıng júrgizip, onyń múmkindigi shekteýli azamattar úshin qolaıly emes ekendigin anyqtady, dep habarlaıdy QazAqparat.

Partııanyń málimetine súıensek, halyqqa qyzmet kórsetip júrgen avtobýstarǵa jasalǵan monıtorıng nátıjesi kóńil qýantpaıdy.

«Negizgi qatelikter - kózi nashar kóretinder úshin dybystyq jáne jaryqtyq ındıkatorlar men mehanıkalyq jyljymaly pandýstardyń bolmaýy. Bul kemshilikterdiń barlyǵy múgedek arbasyna tańylǵan, kózi nashar kóretin, qulaǵy estimeıtin, qımyl-tirek qozǵalysy buzylǵan azamattar úshin qıyndyq týǵyzady» delingen habarlamada.

Derekke sáıkes, Astanadaǵy 1106 avtobýstyń 628-inde ǵana múmkindigi shekteýli jandarǵa jaǵdaı jasalǵan. Statıstıka boıynsha elordada mundaı kómekke zárý 25 719 turǵyn bar. Al, aımaqtaǵy jaǵdaı tipti tómen.

Sol sııaqty jazbada «Nur Otan» partııasy jasalǵan monıtorıng qorytyndysy boıynsha, qoǵamdyq kólikterde azamattardyń barlyǵyna teń jaǵdaı jasaý úshin naqty sheshimder qabyldanatyny aıtylǵan.