Astanada 5 myńǵa jýyq Georgıev lentasy taratylmaq
19:02, 08 Mamyr 2012
ASTANA. 8 mamyr. QazAqparat - Búgin tańerteńnen beri Astanada Uly Otan soǵysynyń aıaqtalǵanyna 67 jyl tolýyna oraı Georgıev lentalary taratylýda.
Elorda ákimdigi taratqan aqparatqa sáıkes, eki kún ishinde Uly Jeńis qurmetine 5 myńǵa jýyq lenta taratylmaq. Atalmysh shara ákimdik ǵımaraty aldyndaǵy alańda ótýde.
Georgıev lentalaryn taratý dástúrli sharasy álemniń 30 elinde qoldaý taýyp, belsendi túrde ótkiziledi. Al Qazaqstanda 2005 jyldan beri qolǵa alyndy. Búginde atalmysh lentalar Jeńis kúnine oraı uıymdastyrylatyn saltanatty sharalardyń ajyramas bóligine aınaldy. Jeti jyl ishinde álem boıynsha 70 mıllıon Georgıev lentasy taratyldy.
Qoǵamdyq sharanyń kózdegen maqsaty - qan maıdanda jeńis úshin janyn pıda etken babalar rýhyna taǵzym etý.