Astanada 5 ınstıtýtsıonaldyq reformany júzege asyrýdyń 100 naqty qadamy talqylandy

ASTANA. QazAqparat - Búgin, 30 mamyr kúni Astanadaǵy Ulttyq mýzeıde QR Prezıdenti Ákimshiligi Basshysynyń orynbasary Baǵlan Maılybaevtyń tóraǵalyǵymen Ult jospary - Memleket basshysynyń 5 ınstıtýtsıonaldyq reformasyn júzege asyrý boıynsha 100 naqty qadamǵa arnalǵan respýblıkalyq konferentsııa ótti.

Forým jumysyna óńirlerden kelgen ókilder, ishki saıasat, mádenıet, jastar saıasaty basqarmalarynyń basshylary, Qazaqstan halqy Assambleıasynyń óńirlik hatshylyqtarynyń meńgerýshileri, joǵary oqý oryndarynyń rektorlary, oblystyq BAQ jetekshileri, ǵylymı-saraptamalyq qaýymdastyq ókilderi qatysty.

Forým barysynda bes ınstıtýtsıonaldyq reformany júzege asyrý mindetteri men tetikteri talqyǵa salyndy.

QR Prezıdenti Ákimshiligi Basshysynyń orynbasary B. Maılybaevtyń aıtýynsha, áleýmettik blok mınıstrilkteri, jergilikti atqarýshy organdar jáne jalpy qazaqstandyq qoǵam aldynda qadam-qadammen bes reformany iske asyrý jáne Ult josparynda Elbasy júktegen naqty maqsattarǵa qol jetkizý mindeti tur.

Memleket basshysy kórsetip ótkendeı, elimizdiń basty maqsaty álemniń eń ozyq otyz eliniń qataryna kirý jáne Ekonomıkalyq yntymaqtastyq jáne damý uıymy elderiniń standarttaryna qol jetkizý bolyp tabylady.

B.Maılybaevtyń atap ótýinshe, «Ult jospary - 100 naqty qadam» qoǵam ómiriniń basty salalaryn jańǵyrtýǵa baǵyttalǵan.

15 qadam memlekettik aparat kásibıligin arttyrýǵa baǵyttalǵan.

19 qadam - sot júıesi men quqyq qorǵaý organdarynyń jumysyn jańǵyrtý boıynsha tıimdi is-qımyldar.

50 qadam - jańa joǵary tehnologııalyq ekonomıkalyq ósim men adam kapıtalyn damytýdy yntalandyratyn, qazaqstandyqtardyń ómir sapasyn jaqsartýǵa baǵyttalǵan naqty ári týra sheshimder.

6 qadam - jalpyqazaqstandyq qoǵam birliginiń sáıkestigin, «Máńgilik El» qundylyqtary júıesin damytýdy boljap otyrǵan salmaqty sharalar.

10 qadam «Ashyq Úkimet» jumysynyń mehanızmderin, memlekettik organdardyń ashyqtyǵy men esep berýshiligin, qoǵamdyq baqylaý, azamattyq qatysýdy kúsheıtýdi jetildirýdi qamtamasyz etedi.

Keńestiń jumysyna Qazaqstan halqy Assambleıasy tóraǵasynyń orynbasary - QHA hatshylyǵynyń meńgerýshisi E.Toǵjanov, Bilim jáne ǵylym mınıstri A.Sárinjipov, Mádenıet jáne sport mınıstri A.Muhamedıuly, QR Prezıdenti janyndaǵy qazaqstandyq strategııalyq zertteýler ınstıtýtynyń dırektory E.Karın, QR Prezıdenti janyndaǵy Ortalyq kommýnıkatsııalar qyzmetiniń dırektory E.Babaqumarov qatysty.

Shara sońynda naqty tapsyrmalar men keńester berildi.