Astanada 34 myńnan astam bala mektepke deıingi bilimmen qamtylǵan

ASTANA. QazAqparat - Memleket basshysynyń «Nurly jol - bolashaqqa bastar jol» atty Joldaýynda elimizdi áleýmettik modernızatsııalaý máseleleri qozǵalǵan.

Prezıdent Nursultan Nazarbaev apatty jaǵdaıdaǵy mektepter men úsh aýysymdyq oqý, sonymen qatar, balabaqshalardyń jetispeýshiligi máselelerin sheshý jónindegi mindetterdi alǵa qoıdy. Mektepke deıingi uıymdarda oryn tapshylyǵyn azaıtý úshin úsh jyl boıy qosymsha 20 mlrd. teńge baǵyttalmaq.

Astana qalasynyń Bilim basqarmasynyń málimetinshe, qazirgi kezde elordada 76 memlekettik jáne 73 jeke menshikti balabaqsha jumys isteıdi. Sonymen qatar, qalada 25 shaǵyn ortalyq, «mektep-baqsha» formatyndaǵy 5 uıym jáne 2 vedomstvolyq balabaqsha ashylǵan.

Búgingi tańda elordada 34 195 bala mektepke deıingi bilimmen qamtylǵan deteı, 83 551 bala balabaqshaǵa kezekte tur. Mektepke deıingi bilimge muqtaj 3-6 jastaǵy balalar sany 31 148 adamdy quraıdy.

Eske salaıyq, Astana qalasy Qurylys basqarmasynyń málimetinshe, jyl sońyna deıin jalpy 1260 orynǵa eseptelgen 5 balabaqsha men bir qosymsha ǵımarattyń qurylysy aıaqtalady.

Budan basqa, 1960 orynǵa arnalǵan 8 balabaqshanyń qurylysy jalǵasýda, dep habarlaıdy elorda ákimdiginiń resmı saıtynann.