Astanada 3201 azamat múgedektigi boıynsha baspana kezeginde tur - basqarma

ASTANA. QazAqparat – Astana qalasynda І jáne ІІ toptaǵy 3201 múgedek azamat úı kezeginde tur. Bul týraly qalalyq maslıhatta ótken turaqty komıssııanyń otyrysynda Turǵyn úı jáne turǵyn úı ınspektsııasy basqarmasy basshysynyń orynbasary Ǵalymjan Beısen málim etti, dep habarlaıdy QazAqparat tilshisi.

«Astana qalasynyń turǵyn úı jáne turǵyn úı ınspektsııasy memlekettik mekemesiniń áleýmettik osal toptarynyń tiziminde 3 201 azamat І jáne ІІ toptaǵy múgedek sanaty boıynsha tur. Al 1892 azamat múgedektigi bar balalardy tárbıelep otyrǵan otbasylar esebinen turǵyn úı kezeginde tur. Joǵaryda atalǵan azamattar satyp alý quqyǵynsyz jalǵa beriletin turǵyn úı baǵdarlamasy aıasynda baspanamen qamtylýda. 3 jyl ishinde joǵaryda atalǵan sanattarǵa jatatyn azamattarǵa 374 páter satyp alý quqyǵynsyz berildi», - dedi Ǵalymjan Beısen.

Onyń aıtýynsha, turǵyn úı ınfroqurylymyn damytýdyń 2026 jylǵa deıingi tujyrymdamasyna sáıkes, «Baqytty otbasy» baǵdarlamasy qaıta qaralǵan. Atap aıtqanda, ondaǵy tolyq emes otbasy sanaty alynyp tastalyp, onyń ornyna jetim balalar, І jáne ІІ toptaǵy múgedek adamdar men múmkindigi shekteýli balalardy tárbıelep otyrǵan otbasylar engizilgen.

«Múgedekter tobyn qaıta qaraý nátıjesi boıynsha, І jáne ІІ toptaǵy múgedekter ІІІ topqa aýysqan jaǵdaıda turǵyn úıge muqtajdar sanynan shyǵarylady. Aıta keteıin, 2020 jyly - 121, 2021 jyly - 543, al 2022 jyly - 79 azamat ІІІ topqa aýysýyna baılanysty baspana kezeginen shyǵaryldy», - dep toqtaldy basqarma basshysynyń orynbasary.

Eske salaı keteıik, buǵan deıin QR Parlamenti Májilisiniń depýtaty Baýyrjan Sartbaev kommýnaldyq qyzmet jumysshylaryna baspana satyp alý úshin jeńildetilgen paıyzy tómen nesıe berý baǵdarlamasyn iske qosýdy usynǵan bolatyn.