Astanada 300-ge jýyq qazaqstandyq Dúnıejúzilik qar kúnin merekeleýge qatysty
Osy kúni atalǵan merekelik sharaǵa qatysýshylar qarmen túrli oıyndar oınap, shańǵy teýip, muz aıdyndarynda syrǵanady. Bul týraly Shańǵy jarystary federatsııasynyń baspasóz qyzmetinen habarlandy.
Dúnıejúzilik qar kúnin merekeleý sharasyna osymen ekinshi jyl qatarynan Halyqaralyq shańǵy sporty federatsııasy bastama jasap keledi. Sharanyń maqsaty qysqy sport túrlerine qalyń buqaranyń qyzyǵýshylyǵyn arttyrý, jastardy salaýatty ómir saltyna kóptep tartý bolyp tabylady. Al Qazaqstannyń astanasynda ótken sharany Shańǵy jarysy federatsııasy «Samuryq-Qazyna» UÁQ-nyń demeýshiligimen júzege asyrdy. Dál osy kúni astanamen birge Dúnıejúzilik qar kúnin Reseı, Shveıtsarııa, Fınlıandııa, Norvegııa, Vengrııa, Japonııa sekildi álemniń 39 eli atap ótti.
Ataýly kún aıasyndaǵy basty shara kishkene balalardan bastap, qarııalarǵa deıin jappaı qatysqan shańǵy jarysy boldy. Onyń ishinde 1 jáne 5 jas aralyǵyndaǵy shańǵyshylardyń «baby-sprınt» jarysyna qatysýshylar 25 metrge júrip ótip, qyzdar arasynda Imanǵajına Tomırıs pen Saǵatbek Arýjan jeńimpaz atandy. Sonymen qatar, balalar arasyndaǵy sprınt jeńimpazdary: Darıa Tereşenko (2004 jylǵa deıin týǵan qyzdar arasynda) jáne Ilıa Gerasımenko (2004 jylǵa deıin týǵan uldar arasynda), Ksenııa Shevchýk (2002-2003 jyly týǵan qyzdar arasynda), V. Gerasımenko (2002 2003 jyldar aralyǵynda týǵan er balalar arasynda) jeńimpaz atandy.
Al aınalma jarystardyń qorytyndysy boıynsha birinshi orynda Raýshan Moldahmetova men Artem Mıronıýk (1994-1995 j.t.), Aıǵanym Jumaǵulova men Rústem Kóperbaev (1996 -1997 j.t), Darıa Lıýdvıg pen Vladımır Chervonnyı (1998 -1999 j.t.) ózara bólisti.
Jeńimpazdar uıymdastyrýshylar tarapynan baǵaly syılyqtarmen marapattaldy.