Astanada 30 júrgizýshi meshit mańyna kóligin qoıǵany úshin nómirinen aıyryldy

ASTANA. QazAqparat – Astanada «Áziret Sultan» meshiti mańyndaǵy aıaldamaǵa avtobýstardyń toqtaýyna kedergi keltirmeý maqsatynda kólikterdi turaqqa qoıýǵa tyıym salynǵan bolatyn. Tyıymdy elemegen júrgizýshiler kólik nómirlerinen aıyrylyp jatyr, dep habarlaıdy QazAqparat.

CTS kompanııasynyń kóliktik baqylaý departamenti Polıtsııa departamentiniń qyzmetkerlerimen birlesip 15 tamyzdan bastap reıd ótkizip jatyr.

Táýelsizdik dańǵylynda Ahmet Baıtursynov kóshesi baǵytynda ornalasqan aıaldamada avtobýstan basqa kólik quraldary úshin «Aıaldama, turaqqa tyıym salynady» jol belgisi bar. Belgini elemeıtin júrgizýshiler jeke jáne qyzmettik kólikterin jol boıynda qaldyryp ketedi. Bul óz kezeginde qoǵamdyq kóliktiń qozǵalysyn qıyndatady.
«Birlesken jumys barysynda 80 kólik ıesimen túsindirme jumystary júrgizildi, 50 adamǵa ákimshilik hattamalar toltyryldy, sondaı-aq 30 avtomashınadan memlekettik nómirleri alyndy», - delingen habarlamada.