Astanada 27 azamatqa «Til janashyry» qurmet belgisi tabys etildi

ASTANA. 7 qarasha. QazAqparat - Búgin Astanadaǵy QR Tuńǵysh Prezıdenti murajaıynda «Til janashyry-2013» marapattaý rásimi ótti. «Til janashyry» qoǵamdyq birlestiginiń bul nagradasy qazaq tiliniń órkendeýine atsalysyp kele jatqan azamattardy yntalandyrýǵa arnalǵan.

Uıymdastyrýshylardyń málimetinshe, bıyl oblys ákimshilikteri, qoǵamdyq uıymdar men mekemeleri osy belgimen marapattaýǵa elimizdiń túkpir-túkpirinen 100-ge jýyq adamdy usynǵan kórinedi. «Til janashyry» qoǵamdyq birlestiginiń qurmetti tóraǵasy Mahmud Qasymbekov basshylyq etken irikteý komıssııasy solardyń ishinen 27 úzdikti tańdaǵan.

Atap aıtar bolsaq, L.Gýmılev atyndaǵy Eýrazııa ulttyq ýnıversıteti Jýrnalıstıka jáne saıasattaný fakýltetiniń dekany, professor Qaırat Saq, Q.Jubanov atyndaǵy Aqtóbe memlekettik óńirlik ýnıversıtetiniń fılologııa fakýltetiniń dekany Sabyrjan Muhtarov, І.Jansúgirov atyndaǵy Jetisý memlekettik ýnıversıtetiniń oqytýshysy, fılologııa ǵylymdarynyń kandıdaty Tursyn Sydyqov, S.Toraıǵyrov atyndaǵy Pavlodar memlekettik ýnıversıtetiniń «Geografııa jáne týrızm» kafedrasynyń professory, geografııa ǵylymdarynyń doktory, oblystyq onomastıka komıssııasynyń múshesi Qýat Saparov, S.Amanjolov atyndaǵy Shyǵys Qazaqstan memlekettik ýnıversıtetiniń qazaq tili jáne ádebıeti kafedrasynyń professory, pedagogıka ǵylymdarynyń doktory Shynar Qurmanbaeva, Almaty oblysyndaǵy Úmbetáli Káribaev atyndaǵy ádebı-memorıaldyq murajaıynyń dırektory, aqyn, QR Jazýshylar odaǵynyń múshesi, QR Mádenıet qaıratkeri Nadejda Lýshnıkova, Atyraý oblysy «Teńizshevroıl» kompanııasynyń memlekettik tilge jaýapty mamany Lıýbov Tolstova, «Katev» halyqaralyq qorynyń prezıdenti Mehmet Mesýt Ata jáne basqalar bar.

Aıta ketý kerek, «Til janashyry» qurmet belgisi alǵash ret qazaq tilin zerttep júrgen sheteldik ǵalymdarǵa berildi. Olardyń qatarynda Túrkııa professory Abdývahab Kara, Eýropa qypshaqtary qaýymdastyǵynyń prezıdenti Vad Laslo, Ońtústik Koreıanyń Hankýk ýnıversıtetiniń professory Iýn Sı Ne, Mıýnhen ýnıversıtetiniń professory Qaıým Kesıjı, Indıana ýnıversıtetiniń professory Ýılıam Fıerman bar.

Sharaǵa «Nazarbaev Ortalyǵy» memlekettik mekemesi, Qazaqstan Respýblıkasy Tuńǵysh Prezıdenti murajaıy, «Til» respýblıkalyq aqparattyq-saraptamalyq jýrnaly, «Altyn qyran» halyqaralyq qaıyrymdylyq qory qoldaý kórsetti.