Astanada -23 gradýstan tómendegende jylý nysandarynyń qaýqary jetpegen

ASTANA. QazAqparat – Bıyl Astanadaǵy jylý nysandary temperatýra -23 gradýstan tómendegende halyqty qajetti jylýmen qamtamasyz etýge qaýqarsyz bolyp shyqqan. Bul týraly qalalyq Jylý-energetıka kesheni jáne kommýnaldyq sharýashylyq basqarmasynyń basshysy Marsel Uzaqov aıtty, dep habarlaıdy QazAqparat tilshisi.

«Bıylǵy jylytý maýsymynda qalanyń jylý júktemesi 3 191 Gkal boldy. Al jylý kózderiniń qýaty 2 759 Gkal ǵana boldy. Osylaısha syrttaǵy aýa temperatýrasy -23 gradýstan tómendegen kezde 432 Gkal kóleminde jylý energııasynyń tapshylyǵy týyndady», - dedi ol turaqty salalyq komıssııanyń kezekti otyrysynda.

Atalǵan tapshylyqty azaıtý úshin jańa qýat kózderin salynyp jatqany da aıtyldy.

«Bul – birinshi kezekte qýaty 440 Gkal bolatyn №3 jylý-elektr ortalyǵynyń qurylysy. Sondaı-aq gazben janatyn eki birdeı jylý qazandyǵynyń qurylysy júrip jatyr. Onyń bireýi – Qorǵaljyńdaǵy qýaty 600 Gkal bolatyn qazandyq. Ekinshisi – Ońtústik-shyǵys aýdanyndaǵy qýaty 350 Gkal bolatyn qazandyq.

Bıyl Qorǵaljyńdaǵy gazben janatyn qazandyqtyń 344 Gkal qýatyn iske qosý josparlanǵan», - dedi Marsel Uzaqov.

Máslıhat depýtattary jańa salynatyn jylý nysandary qaladaǵy jylý tapshylyǵyn qanshalyq sheshe alatynyn surady.

«Qalanyń bas josparynda keleshekte halyq sany 2,4 mln adam bolady degen esep bar. Qoldanystaǵy qazandyqtar men jylý-elektr ortalyqtarynyń, salynyp jatqan nysandardyń múmkindigin eskersek, keleshekte 2,4 mln adamdy jylýmen qamtamasyz etýge bolady. ıAǵnı, jylý kózderiniń qýaty osynsha halyqty jylýmen jabdyqtaýǵa jetkilikti bolady», - dedi basqarma basshysy.