Astanada 2021 jyldyń birinshi toqsanynda órtten 4 adam qaza tapty

NUR-SULTAN. QazAqparat – 2021 jyldyń 1-toqsanynda elordada órt saldarynan 88,8 mln teńge shyǵyn keldi. Bul týraly Nur-Sultan qalalyq Tótenshe jaǵdaılar departamenti Memlekettik órt baqylaý basqarmasynyń bastyǵy Erkin Otarǵalymuly aıtty, dep habarlaıdy QazAqparat tilshisi.

«2021 jyldyń 1-toqsanynda Nur-Sultan qalalyq TJD-nyń kúshteri men quraldary 1 052 ret apattyq-qutqarý jáne kezek kúttirmeıtin jumystarǵa shyqty. Nátıjesinde 138 adam qutqarylyp, 196 adam evakýatsııalandy. 13 zardap shegýshige dárigerge deıingi medıtsınalyq kómek kórsetildi, 243 mln teńgeden astam somadaǵy materıaldyq qundylyq qutqaryldy», - dedi elorda ákimdiginde ótken baspasóz máslıhatynda.

Onyń atap ótýinshe, esepti kezeńde qala aýmaǵynda 231 órt tirkelip, ótken jyldyń dál osyndaı kezeńimen salystyrǵanda birshama artyp otyr. Órt saldarynan 8 adam zardap shekti, onyń ishinde 4 adam qaza tapty. Tilsiz jaýdan kelgen materıaldyq shyǵyn 88,8 mln teńgeni qurady.

«Statıstıkalyq málimetterge sáıkes, oryn alǵan órtterdiń basym bóligi, ıaǵnı 43,7 paıyzy turǵyn úılerde oryn alǵan. Ekinshi orynda - kólik órti, úshinshi orynda sharýashylyq nysandardaǵy órt tur. Órtterdiń 56,7 paıyzyna elektr jabdyqtaryn montajdaý jáne tehnıkalyq paıdalaný, 25,1 paıyzyna jylytý peshterin ornatý jáne paıdalaný kezinde órt qaýipsizdigi erejelerin buzý sebep bolyp otyr. Sondaı-aq adamdardyń otty abaısyz paıdalanýy da órt shyǵýynyń sebebi sanalady», - dedi Erkin Otarǵalymuly.