Astanada 2016 jyly 30 shaqyrymnan astam jol jóndeledi

ASTANA. QazAqparat - Bıyl jalpy uzyndyǵy 33,87 shaqyrymdy quraıtyn 39 kósheni jóndeý josparlanǵan. Qazirgi kezde 20 kóshe - 16,6 shaqyrym jol qalpyna keltirildi, 4 kóshe - 2,01 shaqyrym jol jóndelip jatyr, dep habarlady qala ákiminiń resmı saıty.

Bul týraly elordanyń kólik ınfraqurylymyn damytý máselesi jónindegi qoǵamdyq tyńdaý barysynda Astana qalasynyń avtomobıl joldary basqarmasynyń basshysy Symbat Myrzaǵulov málim etti.

- Biz qalanyń eski bóligin jóndep jatyrmyz. Jangeldın, Máskeý, 9 mamyr kósheleri jóndeldi. Aldaǵy ýaqytta Jeltoqsan kóshesin keńeıtip, jóndeý jáne Áýezov kóshesin jóndeý kózdelgen, - dedi ol.

Onyń aıtýynsha, qalada memlekettik baǵdarlama boıynsha turǵyn úıler men jańa aýdandar tez salynyp jatyr, olardy paıdalanýǵa berý úshin ınjenerlik jelilerdi tartý jáne ótetin joldarmen qamtamasyz etý qajet.

- Tilendıev dańǵyly aýdanynda uzyndyǵy 5,3 shaqyrym bolatyn tórt kóshe salý kerek, atap aıtqanda, Almaty, Jangeldın jáne Almaty-1 kósheleri. Qoshqarbaev, Jumabaev kósheleri aýdanynda jalpy uzyndyǵy 9,1 shaqyrym 7 kóshe salynady. 2017 jyly basqarma Myńjyldyq alleıasyn damytýdy josparlap otyr, osy baǵytta J. Nájimedenov pen Baıtursynov kósheleri salynady, - dedi Symbat Myrzaǵulov.

Jyl saıyn elordada orta eseppen 10 shaqyrym jol jańadan salynady, qozǵalys jolaqtary ulǵaıtylyp, jol tósemi qaıta jóndeledi, 7 shaqyrym ınjenerlik jeli jańartylady. Qaladaǵy jalpy uzyndyǵy 1038,4 shaqyrymdy quraıtyn 953 kósheniń 705,2 shaqyrymyna, ıaǵnı 73,1%-yna asfalt tóselgen.

S. Myrzaǵulov óz sózinde qazirgi kezde Komsomolskıı, Kóktal-2, Ońtústik-Shyǵys (oń jaǵy), Tilendıev dańǵylynyń ońtústigine qaraı tıisti jumystar júrgizilip jatqanyn atap ótti. Qurylysy 2015 jyly bastalǵan ǵımarattardy aıaqtaý jáne 10,5 shaqyrym jol salý josparlanǵan. Sondaı-aq, 2017 jyly Komsomolskıı, Ońtústik-Shyǵys, Kóktal-1, Kóktal-2, Internatsıonalnyı, Mıchýrıno turǵyn alaptarynda 10shaqyrym jol salý men 25 jýyq ınjenerlik jeli tartý jumystary jalǵasady.

2011-2016 jyldary Astana qalasynda 101 shaqyrym jol salynyp, 275,25 shaqyrym ınjenerlik jeli tartylǵan. Kúıgenjar, Qazaqaýyl, Prıgorodnyı, Kazgorodok, Qaraótkel, Zarechnyı jáne Promyshlennyı turǵyn alaptarynda tıisti jumystar aıaqtaldy.

Sonymen qatar, kóshe-jol jelisine túsetin júktemeni azaıtý aıasynda Ýgolnaıa k-si, №14, №12 (Saraıshyq) jáne Sh. Beısekova kóshesimen ótetin Kishi aınalma joldyń qurylysy qolǵa alyndy. Onyń jalpy uzyndyǵy 35 shaqyrymdy quraıdy. Oǵan 7 jol aıryq, 5 jol ótpesi, 1 kópir kiredi.