Astanada asyq atýdan balalar arasynda el chempıonaty ótip jatyr
Chempıonatqa elimizdiń 16 óńirinen, atap aıtqanda, Almaty, Abaı, Aqmola, Atyraý, Batys Qazaqstan, Jambyl, Jetisý, Qaraǵandy, Qyzylorda, Qostanaı, Pavlodar, Soltústik Qazaqstan, Túrkistan, Ulytaý oblystarynan jáne Astana men Almaty qalalarynan 124 asyqshy ul-qyz synǵa túsip jatyr.
«Babalardan mıras bolǵan ulttyq oıynymyzdy sport retinde qalyptastyrýdamyz. Qazaqtyń «asyq oınaǵan azar» degen sózin «asyq oınaǵan ozar» dep ózgertýdemiz. Sebebi jas bala kompıýter, smartfondarǵa telmirgenshe, asyq atýmen aınalyssa deımin. Bul – bizdiń úshinshi resmı jarysymyz. Ótken jylmen salystyrsaq, Abaı, Aqmola oblysynan kelgen komandalar birinshi ret qatysyp jatyr», – dedi jarys uıymdastyrýshysy Jomart Sabyrjanov.
Qyrkúıek aıynda elorda tórinde alǵash ret ótetin V Dúnıejúzilik kóshpendiler oıynynda asyq atý, bes asyq jáne qyrǵyzdardyń ordo atty saıys túrlerinde júlde sarapqa salynady.
«Qazir elimizdiń 19 óńirinde fılıal jumys istep, 90 myńnan astam resmı túrde asyq atýmen aınalysady. 1 119 bapker bar. Búgingi jarysymyz uldar asyq atýdan synǵa tússe, qyzdarymyz bes asyqtan myqtyny anyqtaıdy. Buǵan deıin 10 atqanda nysanaǵa tıgizetin jetkinshekterimizdiń kórsetkishteri ýaqyt saıyn jaqsaryp keledi», – dep túıindedi sózin Jomart Sabyrjanov.