Astanada 2005-2007 jáne 2008-2010 jyldarǵa arnalǵan Memlekettik turǵyn úı baǵdarlamalaryna qatysýshylarǵa baspanalar úlestirildi
«Aǵymdaǵy jyldyń kúzinde 2005-2007 jáne 2008-2010 jyldarǵa arnalǵan Memlekettik turǵyn úı baǵdarlamalarynyń 1 168 qatysýshysy saryla kútken páterlerine kiretin bolady. Turǵyn úı komıssııasynyń otyrysynda Memlekettik turǵyn úı baǵdarlamasy boıynsha salynyp, jańadan tapsyrylǵan úılerden páterler bólindi», - delingen Astana ákimdiginiń taratqan habarlamasynda.
Atap aıtqanda, 2005-2007 jyldarǵa arnalǵan Memturǵyn úı baǵdarlamasyna qatysýshylardyń arasynda Ońtústik-Shyǵys shaǵyn aýdanyndaǵy turǵyn úıdiń 1-shi jáne 2-shi kezeginen barlyǵy 194 páter bólindi.
Al 2008-2010 jyldarǵy Memlekettik baǵdarlamanyń 974 qatysýshysy baspanalardy Tilendıev dańǵylynyń ońtústik bóliginde boı kótergen úılerden alatyn bolady.
Búgin ákimdiktiń resmı saıtyna (www.astana.kz ) qonys toıyn toılamaq azamattardyń tizimi ornalastyryldy. Olar aldaǵy kúnderi satý-satyp alý kelisimderin jasaý úshin Astana qalasy Turǵyn úı basqarmasyna shaqyrylatyn bolady.
Aıta keteıik, Memlekettik baǵdarlama boıynsha turǵyn komıssııasynyń oń sheshimin alǵan, biraq baspanalaryna kirmegen azamattar áli de qalyp otyr. Olar 2005-2007 jyldarǵy Baǵdarlamanyń - 1 375 jáne 2008-2010 jyldarǵy Baǵdarlamanyń - 2 291 qatysýshy.
Ákimdiktiń taratqan aqparatyna súıensek, Memlekettik baǵdarlama boıynsha salynyp jatqan úılerdi paıdalanýǵa berýge ázirlik jumystary jalǵasýda jáne olardyń iske qosylýyna qaraı turǵyn úı komıssııasynyń otyrystary ótkizilip turatyn bolady. Olardyń nátıjeleri týraly qosymsha habarlanyp otyrady.
«Sondyqtan, ózderin búgingi tizimde taba almaǵan azamattarǵa qosymsha sharalardy qoldanýǵa, sonyń ishinde Turǵyn úı basqarmasyna kelýdiń qajeti joq», - dep naqtylanǵan habarlamada.