Astanada 200-ge jýyq dúken azyq-túlik baǵasyn qoldan kótergen

ASTANA. QazAqparat – Elordada dúkenderdiń áleýmettik mańyzy bar azyq-túlikti ústeme baǵamen satqany anyqtaldy. Bul týraly qala ákiminiń orynbasary Erlan Bekmyrzaev málim etti, dep habarlaıdy QazAqparat tilshisi.

«Jyl basynan beri bizdiń monıtorıngtik top 500-ge jýyq dúkendi tekserip shyqty. Onyń ishinde 198 dúken taýardy ústeme baǵamen satyp kelgen. Bizde saýda týraly zań bar, ol boıynsha áleýmettik mańyzy bar taýarlarǵa ústemeaqy 15%-dan aspaýy tıis», - dedi Erlan Bekmyrzaev elordalyq kásipkerlermen kezdesý barysynda.

Onyń aıtýynsha, ákimdik saýda jelilerimen belgilengen baǵadan asyrmaý týraly memorandým jasasqan.

«Ókinishke qaraı, memorandýmǵa qalanyń barlyq saýda jelileri qol qoıǵan joq. Biz bul jerde barlyq taýar týraly aıtyp otyrǵan joqpyz. Baǵany kótermeý áleýmettik mańyzy bar 19 ataýly azyq-túlikke qatysty. Sondyqtan da shaǵyn bıznesti, úı janyndaǵy dúken ıelerin áleýmettik mańyzy bar taýarlardyń baǵasyn ustap turýǵa jáne baǵany qoldan ósirmeýge shaqyramyz», - deıdi ol.

Aıta ketsek, elordada qala orynbasarynyń orynbasary, qalalyq kásipkerler palatasy basshylyǵy jáne túrli bıznes ókilderiniń qatysýymen jıyn ótti.

Sharada densaýlyq saqtaý, týrızm, saýda jáne qyzmet kórsetý boıynsha máseleler ortaǵa salyndy.