Astanada 20 adamdy san soqtyrǵan «jıhaz jasaýshy» sottaldy

<p>ASTANA. KAZINFORM &mdash; Astanada Instagram áleýmettik jelisi arqyly jarnama jasap, jurtty aldaǵan alaıaq &laquo;jıhaz jasaýshy&raquo; sottaldy, dep habarlaıdy qalalyq prokýratýranyń baspasóz qyzmeti.&nbsp;</p>

Qala turǵyny óziniń qylmystyq áreketterin jasyrý maqsatynda, jubaıynyń atynan jeke kásipkerlik rásimdep, jıhaz qurastyrý úshin óndiristik úı-jaıdy jalǵa alǵan. 

«Instagram» áleýmettik jelisinde jıhaz daıyndaý týraly habarlandyrý beınerolıkterin jarııalaǵan. 

Kásipkerlik qyzmettiń kórinisin jasaı otyryp, tapsyrys berýshilerdiń úıine kelip, ózine tıesili emes basqa jumystardyń fotosýretterin kórsetip, jábirlenýshilerdi aldaǵan.

Ólshem alý jumystaryn júrgize otyryp, jeke kásipkerlik atynan shart jasasyp, jábirlenýshilerden tapsyrys somasynyń 70% mólsherinde aldyn-ala tólem alyp otyrǵan. 

Osyndaı tásilmen 20 jábirlenýshige 8,4 mln teńge kóleminde shyǵyn keltirilgen.

Basty sot talqylaýynda sottalýshy jábirlenýshilermen azamattyq-quqyqtyq qatynas bolýyna silteme jasaı otyryp, kinásin moıyndamady.

Memlekettik aıyptaýshy-prokýror onyń kinásin tolyq dáleldedi.

Kináli adam birneshe ret jasaǵan alaıaqtyq úshin 4 jyl bas bostandyǵynan aıyrý jazasyna kesildi. 

Kináliden jábirlenýshilerdiń paıdasyna keltirilgen materıaldyq shyǵyn óndirildi.

Úkim zańdy kúshine endi.

Qala prokýratýrasy elorda turǵyndarymen qonaqtaryna qyraǵy bolýdy, tańdalǵan qyzmettiń nátıjeleriniń durystyǵyna kóz jetkizýdi, sonymen qatar óz jumysy úshin tómen baǵa usynatyn adamdarǵa senbeýdi eskertedi, óıtkeni bunyń bári alaıaqtyqtyń belgisi bolýy múmkin.