Astanada 2 jyldan beri jasyryn jumys istegen maınıng fermasy anyqtaldy

<p>ASTANA. KAZINFORM - Elorda aýmaǵynda tıisti lıtsenzııasyz tsıfrlyq aktıvterdi zańsyz óndirý faktisi boıynsha qylmystyq isti Qarjylyq monıtorıng agenttigi tergeýde.</p>

Kúdiktiler 2022 jyldan bastap 2024 jyldyń mamyr aıyna deıin Astana qalasynyń aýmaǵynda aı saıynǵy elektr qýatyn tutynýy megapolıstegi bir turǵyn alabynyń qajettiligimen parapar bolatyn, qozǵaltqyshtardy óńdeý ortalyǵynyń túrinde jasyrylǵan maınıngtik fermanyń qyzmetin uıymdastyrǵan.

Atalǵan kezeńde óndirilgen zańsyz tsıfrlyq aktıvterdiń quny 143 mln teńgeden asqan.

Sotqa deıingi tergep-tekserý barysynda 1 300-ge jýyq maınıngke arnalǵan apparattyq-baǵdarlamalyq keshen (ASIC), olardy salqyndatýǵa arnalǵan qurylǵylar jáne qosalqy transformatorlyq stantsııa tárkilendi.

Budan basqa olardyń elektr energııasy úshin 25,3 mln teńge somasyna tólem jasamaǵany anyqtaldy.

QPK-niń 201-babynyń talaptaryna sáıkes sotqa deıingi tergep-tekserýdiń ózge de derekteri jarııa etilýge jatpaıdy.