Astanada 120 sarbaz áskerı ant qabyldady

ASTANA. QazAqparat – Elordadaǵy «Otan qorǵaýshylar» alańynda Aqmola óńirlik garnızonynyń №68665 áskerı bólimine kóktemgi shaqyrylymmen kelgen 120 sarbaz saltanatty túrde ant qabyldady, dep habarlaıdy QazAqparat tilshisi.

Shara «Otan Ana» monýmentine gúl shoqtaryn qoıýdan bastaldy. Oǵan Qarýly kúshterdiń ardagerleri, garnızonnyń áskerı qyzmetshileri, «Jas sarbaz» áskerı-patrıottyq qozǵalysynyń tárbıelenýshileri, áskerge shaqyrylýshylardyń týǵan-týystary qatysty.

№68665 áskerı bólimniń Astanadaǵy brıgada komandıriniń tárbıe jáne ıdeologııalyq jumys jónindegi orynbasary Talǵat Qulmanovtyń aıtýynsha, boryshyn óteýge kelgen jastardyń bári jas jaýynger kýrsynan abyroımen ótip, bir aı ishinde áskerı istiń negizderin ıgerip úlgergen.

Búgin ant bergen sarbazdar desanttyq quram qatarynda dene daıyndyǵyn nyǵaıtyp qana qoımaı, joǵary oqý oryndaryna jeńildikpen túsýge múmkindik alady.

«Búgin aldaryńyzda 120 sarbaz ant qabyldady. Bular ant qabyldap bolǵannan keıin bir bóligi shabýyldaýshy batalonǵa, bir bóligi mınamettik batareıa jáne áýege qarsy qorǵanys batalonyna bólinedi.

Áskerı boryshtaryn bir jyldyń ishinde óteıdi. Sarbazdar Jambyl, Almaty, Túrkistan, Qaraǵandy oblystarynan jáne Almaty qalasynan shaqyrylǵan», - dedi podpolkovnık.

Jalpy búgin Qazaqsta Qarýly Kúshteriniń «Ońtústik», «Shyǵys», «Astana» óńirlik qolbasshylyqtarynda qyzmet ótkerip jatqan Qurlyq áskerleri áskerı bólimderiniń úsh myńnan astam azamaty áskerı ant berý rásimin ótkerdi.

Sonyń biri – Almaty oblysynan Astanada boryshyn óteýge shaqyrylǵan qatardaǵy jaýynger Dinmuhamed Nurbolat.

«Bir aıda armııanyń kúndelikti ómirine úırendim. Al áskerı ant qabyldaǵan kún árqashan esimde qalary sózsiz», - deıdi sarbaz.

Sarbazdyń ákesi Nurbolat Nuǵymanov Dinmuhamedtiń bir úıde tórt qyzdyń arasyndaǵy jalǵyz ul ekenin aıtady.

«Bir jyl degen ne?! Biz kezinde eki jyl qyzmet etkenbiz. Onyń ústine bul ár azamattyń boryshy. Ýnıversıtet bitirgennen keıin áskerge baram dep sheshipti. Qarsy bolmadyq. Qazir ásker qatarynda júrip túrli oqys oqıǵaǵa tap bolǵan sarbazdar týraly aqparat kóp shyǵady. Ony oılasaq, qobaljıtynymyz ras. Bizdiń balamyz tórt qyzdyń ishindegi bir ul. Biraq árqaısymyz qobaljı bersek, balalarymyzdy úıge tyǵa bersek, otandy kim qorǵaıdy? Sondyqtan ata-analarǵa aıtatynym, durys túsiný kerek. Qazirgi armııa baıaǵydaǵydaı emes. Osynda arnaıy kelip, bárin kórdim. Balamyzǵa búkil jaǵdaı jasalǵanyna kózimizdi jetkizdik. Sondyqtan, eshbir ýaıymdamaı, balalaryna durys psıhologııalyq baǵyt-baǵdar berip, balalaryn áskerge jiberýge shaqyramyn», - dedi ol.

Ant qabyldaý saltanatynan keıin jaýyngerlerdiń ata-analary áskerı qyzmettiń barysymen, sarbazdardyń turmys jaǵdaıymen tanysýǵa múmkindik aldy.