Astanada 12 jasar oqýshy tabylmaı jatyr

ASTANA. QazAqparat – Elorda mektebinde oqıtyn 12 jastaǵy bala tabylmaı jatyr, dep habarlaıdy QazAqparat tilshisi.

Áleýmettik jelide oqýshynyń týǵan-týystary men jaqyndary onyń joǵalǵany týraly aqparat taratqan bolatyn.

«№90 mekteptiń oqýshysy kesheden beri úıine oralǵan joq. Barynsha taratýlaryńyzdy ótinemin», - delingen áleýmettik jelide taraǵan aqparatta.

Bul jaıtqa qatysty Astana qalalyq ishki ister departamenti de málimet taratyp, polıtsııa balany izdep jatqanyn atap ótti.

«Osy jyldyń 30 qazan kúni elorda turǵyny polıtsııaǵa júginip, 12 jasar balasyn izdeýge járdem berýlerin ótindi. Uly sol kúni saǵat 16-00-de Trýdovaıa kóshesindegi úıinen oınaýǵa shyǵyp ketken. Qazirgi ýaqytta onyń qaı jerde ekeni belgisiz», - dedi departamentten.

Usynylǵan málimetke sáıkes, balanyń boıy – 145-150 sm. Shashy qysqa, qara.

Ústine kapıýshony joq qoıý qyzyl tústi qysqa balon kúrte, butyna aq jolaqtary bar qoıý kók tústi trıko, aıaǵyna qara krossovka kıgen.

Joǵalǵan bala týraly málimet polıtsııa departamentiniń jeke quramyna taratylǵan. Qajetti jedel izdeý jáne tekserý is-sharalary júrgizilip jatyr.

«Sonymen qatar balany izdeý jumysyna volonterler kómektesýde. Qazirgi ýaqytta bala júrýi múmkin baǵyttardyń bárindegi beınebaqylaý kameralary tekserilýde. Munan bólek, kámeletke tolmaǵan jasóspirimniń birinshi ret joǵalmaǵany anyqtaldy. Nátıjesine qaraı otbasy jasóspirimder isi jónindegi polıtsııa qyzmetkerleriniń erekshe baqylaýyna alynady», - dep naqtylaı túsedi vedomstvodan.

Jasóspirimge qatysty qandaı da bir aqparat biletin qala turǵyndary myna telefon nómirlerine habarlasa alady: 8 [phone], 71-65-58, 71-60-27 nemese 102.